Nur Otan azamattarǵa naqty kómek kórsetedi - Máýlen Áshimbaev
«Kópbalaly analar men áleýmettik az qamtylǵan otbasylarǵa qoldaý kórsetý, halyqtyń ál-aýqatyn arttyryp, osy baǵyttaǵy ózekti máselelerdiń oń sheshilýine yqpal etý - «Nur Otan» partııasynyń jumysyndaǵy negizgi basymdyq. Óıtkeni bul - Elbasy, partııa Tóraǵasynyń tikeleı tapsyrmasy. Soǵan sáıkes «Halyqqa kómek» jobasy qolǵa alynyp, tyń bastamalar júzege asyryla bastady. Sondyqtan búgin partııanyń respýblıkalyq qoǵamdyq qabyldaý bólmesinde azamattardy qabyldaǵan Máýlen Áshimbaev osy salaǵa erekshe nazar aýdardy», - delingen partııanyń Feısbýktegi paraqshasynda jarııalanǵan aqparatta.
Qabyldaýǵa kelgenderdiń qatarynda kún kóris deńgeıine baılanysty memleket tarapynan kórsetiletin ataýly áleýmettik kómek alýǵa járdemdesýdi, jeke turǵyn úı salý úshin qoldaý kórsetýdi, baspanamen qamtý máselesine qatysty qol ushyn sozýdy ótingen jáne materıaldyq kómek suraı kelgen kóp balaly, jalǵyzbasty analar boldy. Sondaı-aq jumyspen jáne aýylyn aýyz sýmen qamtý máselesi boıynsha járdem suraǵan azamattardyń da ótinishteri tyńdaldy.
Máýlen Áshimbaev olardyń barlyǵyna «Halyqqa kómek» jobasy aıasynda zań sheńberinde tıisti kómek kórsetiletinin aıtyp, partııanyń birqatar aımaqtyq fılıaldaryna naqty tapsyrmalar berdi. Óz kezeginde fılıal tóraǵalarynyń birinshi orynbasarlary atalǵan máselelerdi oń sheshýdiń tıimdi tetikterin qarastyryp qoıǵanyn jetkizdi. Sondyqtan kóp balaly analardyń máseleleri kóp uzamaı oń sheshimin tabady deýge tolyq negiz bar. Al eki qolyna bir kúrek taba almaı júrgen jas mamannyń máselesi sol arada sheshilip, onyń turaqty jumysqa ornalasqanyn erekshe atap ótken jón.
«Partııa Elbasynyń tapsyrmasymen qolǵa alynǵan «Halyqqa kómek» jobasy arqyly azamattarǵa naqty kómek kórsetedi. Qıyndyqqa tap bolǵan azamattar der kezinde bizdiń qoldaýymyzdy sezinýi tıis. Qazirdiń ózinde joba óz jemisin bere bastady. Aldaǵy ýaqytta jańa bastama partııanyń halyqqa qoldaý kórsetý baǵytyndaǵy jumystaryn jańa deńgeıge shyǵarady dep senemiz», - dedi Máýlen Áshimbaev.
Sonymen qatar, is-sharada áleýmettik jeliler men messendjerler arqyly kelgen ótinishter de qaralyp, olardy sheshý joldary pysyqtaldy. Odan bólek, qabyldaýǵa «Kedergisiz keleshek», «Mektep ashanalary» sııaqty partııalyq jobalarǵa qatysty utymdy usynystaryn bildirgen belsendi azamattar da keldi.