«Nur Otan» astanalyq muǵalimder men dárigerlerge hostelden oryn berýdi usyndy
Bul bastamany «Nur Otan» partııasy Astana qalasynyń fılıaly ákimdikke usynǵan.
«Astanada baspanaǵa qol jetkizý - ózekti máselelerdiń biri. Sondaı-aq qalaǵa 2-3 myń medıtsına qyzmetkerleri jetispeıdi. Jalaqyny kóterý bizdiń qolymyzda emes, ony Úkimet bekitedi. Al Astana - Qazaqstandaǵy eń qymbat qalalardyń biri. Ásirese, úıdi jalǵa alý baǵasy óte qymbat. Ótken jyly «EKSPO-2017» halyqaralyq kórmesin ótkizý úshin kóptegen hostelder salynǵan bolatyn. Ony jalǵa alý kóp qarajatty talap etpeıdi. Biz Áset Órentaıulyna (Áset Isekeshev, Astana qalasynyń ákimi - avt.) taza, sanıtarlyq talaptarǵa saı, dárethanasy men vannasy, balalar oınaıtyn alańy bar hostelderdi kásipkerlerden belgilengen baǵada jalǵa alyp, bilim jáne medıtsına salasynda jumys isteıtin bıýdjettik qyzmetkerlerge, polıtsııaǵa berýdi usynyp otyrmyz», - dedi «Nur Otan» partııasynyń astanalyq fılıaly tóraǵasynyń birinshi orynbasary Baqyt Saparov qalalyq medıtsına qyzmetkerlerin marapattaý rásiminde.
B. Saparovtyń aıtýynsha, eń aldymen hostelge jalaqysy tómen medıtsına qyzmetkerlerin, medbıke, jedel járdem júrgizýshilerin ornalastyrý kerek.
«Meniń oıymsha, ákimdik atalǵan sanattaǵy azamattardyń turý aqysyn óz moınyna alsa, onda Astanada bir máseleniń sheshilgeni», - dep óz sózin tolyqtyrdy partııa ókili.