«Nur Otan» árdaıym ustazdardyń múddesin saqtap qalady – Baýyrjan Baıbek

ALMATY. QazAqparat - «Nur Otan» partııasy tóraǵasynyń birinshi orynbasary Baýyrjan Baıbek Instagram jelisindegi akkaýnty arqyly qazaqstandyq pedagogtardy «Muǵalimder kúnimen» quttyqtady, dep habarlaıdy «QazAqparat» HAA tilshisi.

Onyń aıtýynsha, «Nur Otan» partııasy músheleriniń úshten bir bóligi – kún saıynǵy eńbegi arqyly elimizdiń damýyna baǵa jetpes úles qosatyn ustazdar. Elimizdiń árbir ustazy eńbeginiń memleket pen qoǵam tarapynan laıyqty túrde baǵalanatynyn sezinýi kerek.

«Nur Otan» partııasy árdaıym ustazdardyń múddesin saqtaǵan jáne saqtap qalady da. Elbasy, Ult kóshbasshysy Nursultan Nazarbaevtyń tapsyrmasyna sáıkes depýtattar «Pedagog mártebesi týraly» zań jobasyn jasap shyǵardy. Bul muǵalim mamandyǵyna degen qyzyǵýshylyqty arttyrýǵa, áleýmettik kepildik júıesin jasaýǵa múmkindik beredi. Memleket basshysy Qasym-Jomart Toqaevtyń bastamasymen tórt jyldyń kóleminde pedagogtardyń jalaqysy eki ese ósetin bolady. «Nur Otan» partııasy basshylyǵynyń atynan Qazaqstannyń barlyq muǵalimderine kúrdeli ári jaýapty eńbekteri úshin alǵys bildiremiz. Sizderge densaýlyq pen bereke, shyǵarmashylyq izdenis pen jemisti eńbek tileımiz», - dedi Baýyrjan Baıbek.

Avtor: Danııar Dáýletálıev