«Nur Otan» Almatydaǵy balalar ortalyǵyna logopedtik trenajer syılady
Máýlen Áshimbaev jumys saparyn Almaty qalasyndaǵy Erekshe kútimdi qajet etetin balalarǵa arnalǵan kúndizgi ortalyqtardyń birinen bastady. Atalǵan bólim «Kedergisiz bolashaq» partııalyq jobasyn júzege asyrý maqsatynda «Nur Otannyń» tikeleı bastamasymen jáne qoldaýymen ashylǵan. Partııa basshylyǵy búgingi saparynda ortalyqqa «Delfa» logopedtik trenajeryn syıǵa tartty. Bul jattyǵý quraly arqyly balalar sóıleýge, sózderdi dybystaýǵa arnalǵan ártúrli tapsyrmalardy ońaı oryndaı alady.
«Elbasynyń partııa qyzmetin jańǵyrtý jónindegi tapsyrmasyna oraı áleýmettik baǵyttaǵy jumys barysyn odan ári kúsheıtý kózdelip otyr. Soǵan baılanysty múmkindigi shekteýli jandarǵa, ardagerlerge jáne halyqtyń az qamtylǵan tobyna qoldaý kórsetýge baǵyttalǵan barlyq partııalyq jobalar qaıta qaralyp, olardyń ózektiligi arta túspek», - dedi Máýlen Áshimbaev.
Búginde atalǵan ortalyqta 30 bala jartylaı stantsıonarda arnaıy áleýmettik mindetterdi tegin alyp otyr. Jalpy qala boıynsha 200 balaǵa qyzmet kórsetip otyrǵan 3 bólim jumys isteıdi.
«Nur Otan» partııasy Almaty qalalyq fılıaly baspasóz qyzmetiniń málimetine súıensek, dál osyndaı eki bólimshe taıaýda Jetisý jáne Naýryzbaı aýdandarynda ashylmaq.
Máýlen Áshimbaev ortalyq jumysymen tanysa kele, balalardy ońaltý jáne beıimdeý jumystary júrgiziletin arnaıy kabınetterdi kórdi. Ortalyq qyzmetkerlerimen kezdesýinde ol partııa erekshe kútimdi talap etetin jas qazaqstandyqtardy qoldaýǵa aıryqsha kóńil bóletinin atap aıtty. Kezdesý sońynda balalarǵa partııa atynan arnaıy syılyqtar tabys etildi.