NUR ALEM bolashaq energııasy murajaıy jumysyn qaıta bastaıdy

NUR-SULTAN. QazAqparat - 7 qyrkúıekte elordanyń eń tanymal kórikti jerleriniń biri - NUR ALEM sferasy kelýshilerge esigin aıqara ashady. Murajaı jumys kúnderi saǵat 10.00-den 20.00-ge deıin úzilissiz jumys isteıdi, dep habarlaıdy QazAqparat.

Elorda turǵyndary men qonaqtary NUR ALEM-ge kelgende koronavırýs ınfektsııasy taralmas úshin sanıtarlyq talaptardy ustanýy qajet. Kelýshiler medıtsınalyq maska kıip, áleýmettik qashyqtyqty saqtaýy tıis. Murajaıǵa kirgen kezde kelýshilerdiń dene qyzýy arnaıy qurylǵymen ólshenedi, sonymen qatar obektide antıseptık pen sanıtaızer ornatylǵan.

Murajaıǵa kelýshilerdi sfera pishindi biregeı ǵımarattyń segiz qabaty boıynsha qyzyqty ekskýrsııalar kútedi. Birinshi deńgeıde «Ulttyq pavılon» ornalasqan, onda Qazaqstannyń landshaftary, mádenıeti, tarıhy, búgini men bolashaǵy kórsetilgen.

2-7 qabattarda kelýshiler ǵarysh, kún, jel, sý, bıomassalar men kınetıkalyq energııaǵa arnalǵan ekspozıtsııalarmen tanysa alady. Munda bógettiń kórkemdik qondyrǵylary, kınetıkalyq energııaǵa qatysty tarıhı artefaktiler usynylǵan.

Jel alleıasynda kelýshiler jeldiń ártúrli jyldamdyǵyn sezine alady. Eń joǵarǵy qabatta týrısterdiń nazaryna Qazaqstan astanasynyń bolashaǵyn kórsetetin ekspozıtsııa usynylady.

Qalanyń músin modeli turaqty damý men ekologııalyq tıimdilikti sıpattaıdy. Sondaı-aq barlyq qabattarda robot-gıdter jumys isteıdi.

Eske sala keteıik, murajaıǵa bir ret kirý bıletiniń baǵasy - 1500 teńge.

QR azamattarynyń belgili bir sanattary úshin jeńildikter qarastyrylǵan: oqýshylar men zeınetkerler úshin bılet quny - 500 teńge, stýdentter úshin – 800 teńge.

UOS ardagerleri, barlyq toptaǵy múgedekter, jetim balalar, kópbalaly analar jáne 6 jasqa deıingi balalar NUR ALEM-ge tegin kire alady. Azamattar ózimen birge jeke kýálik pen jeńildikti rastaıtyn qujat ala kelýi kerek.

Kelýshilerge yńǵaıly bolýy úshin NUR ALEM bolashaq energııasy murajaıynda 3 myń kólikke arnalǵan jerasty turaǵy táýlik boıy jumys isteıdi.