NU-da 10-shy bitirýshi túlekterge dıplom tabystaý rásimi ótti
Bıyl 1 500-den astam adam, onyń ishinde 54 sheteldik stýdent dıplom alyp otyr. Rásim kýrstyń úzdik stýdentteri, JOO basshylyǵy men professorlarynyń, Parlament depýtattarynyń, ýnıversıtettiń Qamqorshylyq keńesi músheleriniń, mınıstrlikter men kompanııalar ókilderiniń, sondaı-aq ótken jyldardaǵy túlekterdiń qatysýymen álemdegi eń myqty joǵary oqý oryndarynyń úlgisinde ótti.
Saltanatty rásim akademııalyq sap túzýden bastaldy: rásimniń Bas marshaly, bıyl bul róldi Injenerııa jáne tsıfrlyq ǵylymdar mektebiniń professory Maıkl Lıýıs alyp otyr, skıpetrmen sahnaǵa shyqty – bul ýnıversıtet rásimderiniń mańyzdy atrıbýttarynyń biri. Ol ulttyq qamshy pishininde jasalǵan, shańyraq pen krıstaldan turady, 5 qyry JOO-nyń strategııalyq maqsattaryn beıneleıdi.
Dástúr boıynsha bakalavrıat jáne magıstratýra baǵdarlamalarynyń barlyq túlegi mantııa kıip, ár mekteptiń aıryqsha jalaýlarymen Qamqorshylar keńesiniń músheleri men sahnada otyrǵan professorlar aldynan ótip, óz oryndaryna jaıǵasty. Qazaqstan ánurany oryndalǵannan keıin jáne odan keıingi bir mınýt únsizdikten soń NU prezıdentiniń m.a. Ilesanmı Adesıda, QR Parlamenti Májilisiniń Áleýmettik-mádenı damý komıtetiniń tóraǵasy Ashat Aımaǵambetov bıylǵy jáne ótken jyldar túlekterdi quttyqtaý sózin sóıledi.
NU prezıdentiniń m.a. doktor Ilesanmı Adesıda: “Ýnıversıtet adaldyq pen minsizdikke talpynǵan talantty stýdentterin maqtan etedi. NU-dy sátti aıaqtaýlaryńyz qutty bolsyn, qurmetti bitirýshiler! Bul sizder jáne sizderdiń otbasylaryńyz úshin úlken jeńis. Dıplomdaryńyzdy qolǵa alý úshin aıanbaı eńbek etkenderińizdi bilemin. Sizderdiń kúsh-jigerlerińizdiń, bilimderińiz ben tabandylyqtaryńyzdyń arqasynda osy kún múmkin bolyp otyr. Bilim nárimen sýsyndaýdy osymen toqtatpaı, ári qaraı jalǵastyryp, tanym kókjıekterińizdi keńeıtip, alma-mater qabyrǵasynda júrip úırengenderińizdi álemmen bólisetinderińizge kámil senemin”, — dep túlekterge aqjol tiledi.
Bıyl 1 507 adam dıplom aldy, onyń ishinde 54 sheteldik stýdent bar: atap aıtqanda, 1 038 bakalavr, 408 magıstr, 42 PhD jáne 19 medıtsına doktory. Jaratylystaný, gýmanıtarlyq jáne áleýmettik ǵylymdar mektebi (565 túlek) jáne Injenerlik jáne tsıfrlyq ǵylymdar mektebi (582 adam) eń kóp maman daıyndady. Medıtsına mektebin bıyl 139 stýdent, Taý-ken isi jáne jer týraly ǵylymdar mektebin 57 adam bitirdi. Joǵary Bıznes, Bilim berý jáne Memlekettik saıasat mektepteri 164 maman daıyndady.
“Osy tórt jyl ishinde biz kóp nárseni bastan ótkerdik. Pandemııa kezeńi, saıası ózgerister jáne taǵy basqalary. Osy qıyndyqtarǵa qaramastan, biz búginde álem ýnıversıtetteriniń úzdik 30%-yna kiretin ýnıversıtetti bitirip jatyrmyz. Zertteý jumystaryn júrgizý qabiletimiz ben sińirgen aqyl-oıdy ýnıversıtetke, elimizde jáne adamzatqa kómektesý úshin qoldanýǵa mindettimiz dep sanaımyn. Kompıýterlik ǵylymdar mamany retinde men temirjol qaýipsizdigi júıesi boıynsha jumys istedim jáne onyń jaqyn arada júzdegen adamnyń ómirin saqtap qalýǵa kómektesetinine qýanyshtymyn”, — dedi Erasyl Qadyrjanov, NU-dyń Injenerııa jáne tsıfrlyq ǵylymdar mektebiniń túlegi, Stýdenttik Úkimetiniń burynǵy prezıdenti.
QR Parlamenti Májilisiniń Áleýmettik-mádenı damý komıtetiniń tóraǵasy Ashat Aımaǵambetov: “Ýnıversıtet mıssııasy – memlekettik saıasat, bıznesten bastap, bilim men ǵylymǵa deıin elimizdiń ekonomıkasynyń túrli salalaryndaǵy ózgeristerdiń basynda turatyn biliktiligi joǵary mamandardy daıarlaý. Bar-joǵy 14 jyldyń ishinde NU joǵary bilim salasy boıynsha halyqaralyq qaýymdastyqtyń ishinen óz ornyn taýyp, bedeldi TimesHigherEducation reıtınginde álem boıynsha úzdik zertteý ýnıversıtteriniń 30 paıyzynyń, sondaı-aq Azııanyń úzdik ýnıversıtetteriniń 11 paıyzynyń qataryna kirdi. Ýnıversıtet oqytýshylarynyń, zertteýshileriniń, novatorlarynyń, kásibı ákimshilik qyzmetkerleriniń jáne basshylyǵynyń birlesken jumysy ony Qazaqstannyń túkpir-túkpirindegi, sondaı-aq alys jáne jaqyn sheteldegi talantty jastar úshin tartymdy etti. Stýdentter men túlekterdiń jetken jetistikteri Ýnıversıtettiń jahandyq joǵary bilim kartasyndaǵy bedeli men ustanymyn nyǵaıtady”, — dedi úzdik bitirgen 10 túlekke dıplom tabystap bolǵannan keıin.
Alǵashqy bitirý saltanatynan bastap ınjenerııa, jaratylystaný ǵylymdary, tehnologııalar jáne gýmanıtarlyq ǵylymdar salalary boıynsha barlyǵy 8 746 adam NU dıplomyn aldy. Bıylǵy túlekterdi jáne oqýyn jalǵastyryp jatqan stýdentterdi qosa sanaǵanda, 15 myń adam NU “DNQ-syn tasymaldaýshy” qaýymdastyqty quraıdy. Olardyń negizgi erekshelikteri – akademııalyq adaldyq pen transparenttilik qaǵıdalaryn ustanýy, synı oılaý qabileti men bilimge qumarlyǵy, bastamashyldyǵy.
Bıylǵy qańtar aıyndaǵy jaǵdaı boıynsha jumysqa turǵan NU túlekteriniń shamamen 92%-y (5 277) Qazaqstan ekonomıkasynyń ıgiligine qyzmet etýde, 8%-y (458) álemniń jetekshi kompanııalarynda tájirıbe jınap jatyr. Olardyń basym bóligi bilim men ǵylym, aqparattyq tehnologııalar, óndiris pen ónim óndirý, sondaı-aq qarjy sektorynda jumys isteıdi.
Aıta ketý kerek, NU-dy bitirgennen keıin 10 bakalavrdyń tórteýi Qazaqstannyń jetekshi joǵary oqý oryndarynda, sonyń ishinde NU-da nemese shetelde oqýyn jalǵastyrýda. Olardyń bilimi Kolýmbııa, Garvard ýnıversıtetterinde, Massachýsets tehnologııalyq ınstıtýtynda, Sıngapýr ulttyq ýnıversıtetinde, Seýl ulttyq ýnıversıtetinde, Korol Abdalla atyndaǵy Ǵylym jáne tehnologııalar ýnıversıtetinde, Muhammed ben Zaıd atyndaǵy Jasandy ıntellekt ýnıversıtetinde jáne t.b. bilim ordalarynda joǵary baǵalanýda, bul NU beretin bilim sapasy men onyń joǵary bedeliniń birden-bir dáleli.
Saltanatty bólim bitirýshiniń arnaıy bas kıimin laqtyrýmen jáne NU Prezıdentimen birge sýretke túsýmen aıaqtaldy.