Notarıýstar eńbekaqy men kommýnaldyq bereshekti óndirýge quqyly boldy

ASTANA. QazAqparat - Buryn sottar qaraıtyn azamattyq isterdiń bir bóligi notarıýstarǵa berildi. Menshik quqyǵyn qorǵaý jónindegi zańǵa sáıkes azamattyq-quqyqtyq daýlardyń keıbir túrlerin endi notarıýstar qarastyrady, dep habarlaıdy QazAqparat.

«Bul bereshekti óndirip alý boıynsha daýsyz talaptar. Mysaly, eńbek aqysyn óndirip alý týraly, kommýnaldyq qyzmetter boıynsha bereshekterdi óndirip alý týraly, sondaı-aq notarıaldy kýálandyrylǵan mámilege negizdelgen mindettemeler boıynsha bereshekterdi óndirip alý týraly talaptar jáne basqa da talaptar eskerilip otyr. Bul shara sot arqyly sheshilýine daýly negizder joq bolǵandyqtan, sotpen baılanysty qıyndyqtardy boldyrmaıdy», - delingen QR Ádilet mınıstrliginiń málimetinde.

Sonymen qatar, balalar kútimine alıment óndirip alý, medıatıvtik kelisimderdi oryndaý týraly jáne basqa da daýsyz qujattardan týyndaıtyn azamattyq isterdiń 10 sanaty sotta jeńildetilgen is júrgizý nysanynda qaralatyn bolady. Onda máseleni qaraý jáne sheshim shyǵarý merzimi úsh kúnmen shekteledi.

«Tıisti túzetýler Azamattyq protsestik kodekske jáne «Notarıat týraly» Zańyna menshik quqyǵyn qorǵaýdy kúsheıtý, tórelik, sot júktemesin ońtaılandyrý jáne qylmystyq zańnamany odan ári izgilendirý máseleleri boıynsha zań aıasynda engizildi», - dep atap ótilgen vedomstvo habarlamasynda.