Notarıattyq qupııa uǵymy anyqtaldy – Ádilet mınıstrligi

NUR-SULTAN. QazAqparat – Notarıattyq qupııa uǵymy aıqyndalyp, ony saqtaýǵa mindetti adamdar toby bekitildi. Bul týraly notarıat salasyndaǵy negizgi jańalyqtardy túsindirý barysynda QR Ádilet vıtse-mınıstri Azamat Ámirǵalıev málim etti, dep habarlaıdy QazAqparat tilshisi.

«Endi azamattar men zańdy tulǵalardyń ókilderi óteýli negizde jáne notarıattyq is-áreketterge baılanysty emes quqyqtyq sıpattaǵy basqa da máseleler boıynsha notarıýstardyń konsýltatsııalaryn alýǵa quqyly», - dedi vıtse-mınıstr Ortalyq kommýnıkatsııalar qyzmetinde.

Osy oraıda ol notarıattyq qupııa uǵymy anyqtalǵanyn, sonymen qatar ony saqtaýǵa mindetti adamdar toby belgilengendigin atap ótti.

«Shaǵymdardy respýblıkalyq deńgeıde qaraıtyn organ zańdy túrde bekitildi. Endi jergilikti jerlerdegi tártiptik komıssııalardyń sheshimderimen kelispegen jaǵdaıda azamattarǵa jańadan qurylǵan organǵa shaǵymdanýǵa múmkindik berildi», - dedi Azamat Ámirǵalıev.

Budan buryn habarlanǵandaı, bıyldyń 1 shildesinen bastap jyljymaıtyn múlikpen mámilelerdi resimdeý kezinde eksaýmaqtylyq tártip engiziletinin aıtty.