«Notarıat týraly zańnyń» Konstıtýtsııaǵa sáıkestigin tekserýge negiz joq — Konstıtýtsııalyq Sot
«Ótinish jasaýǵa notarıýstyń múddeli adamdardy habardar etpeı dáleldemelerdi qamtamasyz etý jónindegi áreketi sebep boldy. Daýlanyp otyrǵan normaǵa sáıkes mundaı áreketke notarıýstyń suraý salý ne jazbasha jáne zattaı dáleldemelerdi qarap-tekserý hattamasyn jasaý jolymen qamtamasyz etý keıinge qaldyrýǵa nemese iske keıinnen kimniń qatysatynyn anyqtaýǵa bolmaıtyn jaǵdaılarda jol beriledi», — delingen habarlamda.
Bul rette, notarıýs suraý salý ne jazbasha jáne zattaı dáleldemelerdi qarap-tekserý hattamasynda múddeli adamdarǵa habarlamaı notarıattyq is-áreket jasaý qajettigin kýálandyratyn sebepti kórsetýge mindetti (Qazaqstan Respýblıkasy Ádilet mınıstriniń 2012 jylǵy 28 aqpandaǵy № 7447 buıryǵymen bekitilgen Notarıýstardyń notarıattyq is-áreket jasaý erejesiniń 210-tarmaǵy).
Konstıtýtsııalyq Sot ótinishti aldyn ala qaraý jáne zańnama normalaryn taldaý nátıjeleri boıynsha Notarıat týraly zańnyń 99-babynyń 4-tarmaǵy belgisizdik týdyrmaıdy jáne ótinish berýshiniń konstıtýtsııalyq quqyqtaryn buzbaıdy degen qorytyndyǵa keldi.
«Daý týǵyzyp otyrǵan norma aıryqsha sıpatqa ıe jáne dáleldemelerdi olardyń joǵalý qaýpine baılanysty notarıýs belgileýi múmkin naqty jaǵdaılardy ǵana kózdeıdi. Notarıýs kýálandyrǵan dáleldemeler sotta daýlanýy múmkin bolyp tabylady. Sýdıa usynylǵan dáleldemelerdi olardyń jıyntyǵynda iste bar dáleldemelerdi beıtarap, jan-jaqty jáne tolyq qaraýǵa negizdelgen óziniń ishki senimi negizinde derbes baǵalaıdy. Bul rette múddeli azamat sotta qorǵaý quqyǵynan aıyrylmaıdy, sebebi eshbir dáleldiń sot úshin aldyn ala belgilengen kúshi joq (APK-niń 1 jáne 2-tarmaǵy). Osylardy eskere otyryp jáne „Konstıtýtsııalyq Sot týraly“ Konstıtýtsııalyq zańnyń 48-baby 3-tarmaǵynyń 1) tarmaqshasyn basshylyqqa ala otyryp, Konstıtýtsııalyq Sot 1997 jylǵy 14 shildedegi „Notarıat týraly“ Zańnyń 99-baby 4-tarmaǵynyń Konstıtýtsııaǵa sáıkestigin qaraý týraly ótinishti konstıtýtsııalyq is júrgizýge qabyldaýdan bas tartty», — dep habarlady Konstıtýtsııalyq Sottyń baspasóz qyzmeti.