Norvegııalyq saıasatker Qazaqstan táýelsizdiginiń 30 jyldyǵy týraly pikir bildirdi

NUR-SULTAN. QazAqparat – Táýelsizdiktiń 30 jyldyǵy jetistikterdi saralap, keleshekti aıqyndaıtyn jaýapty kezeń. Norvegııanyń burynǵy premer-mınıstri jáne Hrıstıan-demokratııalyq partııasynyń jetekshisi Kell Magne Bondevık «Vårt Land» (Bizdiń jer) gazetinde osyndaı oı aıtty, dep habarlaıdy QazAqparat tilshisi.

«Osydan 30 jyl buryn Sovet odaǵy ydyrap, birneshe el qaıtadan táýelsiz memleket atandy. Olardyń biri Qazaqstan edi. Bul el ornalasqan jeri men saıasatyna qaraı Eýropaǵa bastaıtyn kópir retinde mańyzdy ról atqara alady. Qazaqstan Shyǵys pen Batys arasyndaǵy kópir bola alady. Táýelsizdik alǵan sátten bastap bul eldiń damýyn baqylaý qyzyq boldy. 20 mıllıonǵa jýyq halqy bar memleket tabıǵı resýrstarǵa, ásirese munaıǵa, gazǵa jáne kómirge baı. Eldiń geografııalyq aýqymy búkil Batys Eýropaǵa para-par. Shekarasy Qytaı men Reseı sııaqty qýatty kórshilermen shektesedi», - dep jazady saıasatker.

Sondaı-aq, ol Qazaqstan úshin táýelsizdiktiń 30 jyldyǵy ótkenge esep berip, keleshekke jańa baǵdar izteıtin jaýapty kezeń degen paıym aıtady.

«Qazaqstan táýelsizdiginiń 30 jyldyǵy – bul eldiń qol jetkizgen nátıjeleri men álemdik arenada atqaratyn rólin eske salýdyń múmkindigi. Bul sonymen qatar Qazaqstanǵa Eýropamen demkoratıa jáne adam quqyqtaryn nyǵaıtý jolynda kúsh biriktirip, sol arqyly Ortalyq Azııany jáne búkil álemdi qaýipsizdik jolynda yntymaqtastyqqa shaqyrýǵa múmkindik beredi», - deıdi Norvegııanyń Hrıstıan-demokratııalyq partııasynyń jetekshisi.