Norvegııalyq BAQ Denıs Ten týraly: Ol halyqtyń súıiktisi edi
«25 jastaǵy Denıs Ten Almaty qalasynyń ortalyǵynda qastandyqtan mert boldy. Sportshy pyshaq jaraqatynan aýrýhanaǵa jetkenshe úsh lıtr qan joǵaltty», - aıtty «TV 2» telearnasynyń tilshisi Ole Henrık Hansen óz reportajynda.
«TV 2» korrespondenti Denıs Tenniń Sochı Olımpıadasynda qol medal jeńip alǵanyn, oǵan deıin Álem chempıonatynyń kúmis júldesin ıelengenin, óz eliniń betkeustar sportshysy bolǵanyn eske saldy.
Norvegııanyń iri basylymy - «Aftenposten» gazeti Denıs Ten óliminiń sebepteri týraly materıalda Halyqaralyq Olımpıada komıtetiniń prezıdenti Tomas Bahtyń kóńil aıtýyn keltirgen: «Denıs Ten tamasha sportshy jáne óz sport túriniń ǵajap elshisi edi. Mundaı jastyń qyrshynnan qıylýy - orny tolmas qaıǵy».
«Dagbladet» gazeti «Olımpıada juldyzy kóshe ortasynda mert boldy» taqyrybynda maqala jarııalady. Maqalada beıtanys er adamdardyń shabýylynan soń, sportshynyń úsh saǵat boıy ómir men ólim arasynda kúreskeni, dárigerlerdiń onyń ómirin saqtap qala almaǵany jazylǵan.
Sondaı-aq, «Dagbladet» «Eurosport» arnasynyń sarapshysy Lız Resto Ensenniń qaıǵyly habardy estip, eseńgirep qalǵanyn jazǵan. L. Ensen Denısti «Óz zamanynyń tartymdy ári tanymal atleti» dep baǵalaǵan.
«Eurosport» sarapshysy Denıstiń ómirde kópshil, dostarynyń kóp bolǵanyn, jaraqat alsa da, birneshe jobaǵa qatysqanyn eske saldy.
«Ol halyqtyń súıiktisi edi», - deıdi L. Ensen.
Aıta ketsek, Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Adam óltirý babymen qylmystyq is qozǵaldy.
Búgin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
Sondaı-aq, Denıs Tenniń ólimine kúdikti Nuraly Qııasov kúzetpen Almaly aýdandyq sotyna jetkizilgen.
Al Denıs Tenniń ólimi boıynsha kúdikti ekinshi adam Arman Qudaıbergenov ustaldy.