Norvegııada jerlengen qazaqstandyq jaýyngerlerdiń jańartylǵan tizimi jarııalandy
Málim etilgendeı, sońǵy aılarda 12 qazaqstandyq sarbazdyń aty-jóni men jerlengen jeri anyqtaldy. Esimderi belgili qazaqstandyq soldattardyń jalpy sany – 56 adam.
«Tizimde sarbazdyń týǵan jyly men mekeni, áskerge shaqyrý, qyzmet etý, tutqyndalýy, qaıtys bolýy jáne jerlengen jeri, týystary týraly málimetter, sondaı-aq qolda bar qujattarǵa siltemeler berilgen.
Tizim «Falstad ortalyǵy» (Norvegııa), Qazaqstan aýmaǵynan shaqyrylyp Ekinshi dúnıejúzilik soǵys kezinde qaza tapqan nemese habarsyz ketken áskerı qyzmetshiler týraly «Memorıal» derekter banki, sondaı-aq Reseılik «Memorıal» jıyntyq derekter banki sııaqty birneshe derek kózderinen alynǵan aqparatty salystyrý arqyly jasaldy», - delingen QR Syrtqy ister mınıstrliginiń habarlamasynda.
«Falstad ortalyǵy» usynǵan aqparat soldattyń jerlengen orny týraly naqty málimetterimen qundy.
Reseılik «Memorıalda» áskerı tutqyndardyń kartotekasy bar, al qazaqstandyq «Memorıaldyń» málimetterinde Qazaqstan jaýyngeriniń týǵan jeri men áskerge shaqyrylýy týraly tolyq aqparat qamtylǵan.
«Qaza tapqan sarbazdardyń deni bir nemese eki ǵana málimetter bazasynda kórsetilgeni izdeýdi qıyndatady. Kóptegen jaǵdaıda soldat esimi men geografııalyq ataýlardyń burmalanyp jazylýy problemasy da bar», - dedi syrtqysaıasat vedomstvosynan.
Elshilik Norvegııada jerlengen qazaqstandyq sarbazdardyń barynsha tolyq tizimin jasaý maqsatynda norvegııalyq «Falstad ortalyǵymen» ózara árekettesýdi jalǵastyrmaq.
Búgingi kúnge deıin Norvegııada jerlengen burynǵy KSRO áskerıleriniń shamamen 15 500-i týraly belgili boldy, olardyń 7 804-niń esimi anyqtaldy.
Sonymen qatar, Elshilik Norvegııadaǵy qaza tapqan qazaqstandyqtardyń taǵdyry týraly jazylǵan basqa da derekkózderdi zertteýde. Atap aıtqanda, jýyrda tabylǵan derekkóz boıynsha 1944 jyly 27 maýsymda Kırkenesti bombalaý kezinde 22 qazaqstandyq qazaǵa ushyraǵan.
«2020 jyldyń qańtarynda 44 soldattyń alǵashqy tizimi jarııalanǵannan beri tek bir sarbazdyń týysqandary ǵana tabyldy. Elshilik jarııalanǵan aqparat sarbazdardyń urpaqtaryn, týystary men jaqyndaryn tabýǵa kómektesedi, zertteýlerdi odan ári júrgizýge jáne soldattardy máńgi este qaldyrýǵa úles qosady dep úmittenedi», - dedi mınıstrlikten.
Fotosýrette: Norvegııanyń Tetta aralyndaǵy Keńestik áskerı zırattaǵy eskertkish.