Norvegııada Naýryz meıramy atap ótildi

STAVANGER. QazAqparat - Norvegııanyń munaıly astanasy - Stavanger qalasynda Naýryz meıramyna oraı saltanatty shara ótti, dep habarlaıdy «QazAqparat» HAA.

Norvegııa Koroldigindegi Qazaqstan Respýblıkasy Elshiliginiń kómegimen Stavangerde otandastarymyzdyń basyn qosqan «NORKAZ» qoǵamdyq birlestigi uıymdastyrǵan merekelik sharaǵa qazaq dıasporasy, norvegııalyq bıznes qaýymdastyǵynyń ókilderi jáne vıkıngter jerinde turatyn jáne jumys isteıtin otandastarymyzdyń kóptegen dostary qatysty.

Kóktem merekesine arnalǵan quttyqtaý lebizderin alǵashqy bolyp «NORKAZ» qoǵamdyq qorynyń basshylary Láılá Muqysheva men Baqytjan Qalıev, Norvegııadaǵy Qazaqstan isteriniń ýaqytsha senimdi ókili Іlııas Omarov, Qazaqstandaǵy Norvegııanyń alǵashqy qurmetti konsýly Per Rıtterdal bildirdi.

Qazaqstandyq dıplomattar myńdaǵan jyldar boıy merekelenip kele jatqan meıramnyń dástúri, onyń halyqaralyq mazmuny jóninde aıtyp, ıÝNESKO kóktemniń bul merekesin ǵalamshardyń Búkilálemdik mádenı muralar tizimine engizgenin atap ótti. 2010 jylǵy BUU Bas Assambleıasy qabyldaǵan qararǵa sáıkes, dúnıejúzilik qaýymdastyq jyl saıyn Halyqaralyq Naýryz merekesin atap ótedi.

Mereke qonaqtarynyń nazaryna kontserttik baǵdarlama usynyldy. Stavanger hory Abaıdyń «Kózimniń qarasy» ánin oryndasa, 7 jastaǵy Álı Qızatbaı dástúrli norveg keıipkeri týraly «Ola Nordman» ánin shyrqap, kópshiliktiń qoshemetine bólendi.

Budan bólek qonaqtar arnaıy ázirlengen dástúrli naýryz kóje men basqa da ulttyq taǵamdardan dám tatty.

Sondaı-aq, Naýryz meıramy týraly vıktorınalyq suraqtar qoıylyp, ulttyq oıyn túrlerinen jarystar uıymdastyryldy.

Avtory Arsen Dılım