Norvegııada koronavırýs juqtyrýdyń rekordtyq kórsetkishi tirkeldi

NUR-SULTAN. QazAqparat – Norvegııada koronavırýs ınfektsııasyn juqtyrýdyń rekordtyq kórsetkishi tirkeldi. Bul týraly Qazaqstanda koronavırýstyń taralýyna jol bermeý jónindegi vedomstvoaralyq komıssııanyń Telegram-kanalynda aıtyldy, dep habarlaıdy QazAqparat.

Norvegııada pandemııa bastalǵannan beri koronavırýs ınfektsııasymen syrqattanýdyń rekordtyq táýliktik ósimi tirkeldi - 2 552 jańa jaǵdaı. Dúnıejúzilik densaýlyq saqtaý uıymynyń málimetteri boıynsha Norvegııada bir apta ishinde vırýstan ólim-jitim 67% artty. Pandemııa bastalǵaly Norvegııada koronavırýs ınfektsııasynyń 235 314 deregi anyqtaldy, 995 naýqas qaıtys boldy.

Ońtústik Koreıada ótken táýlikte koronavırýstyń 3 292 oqıǵasy tirkeldi. Pandemııa bastalǵaly elde koronavırýsty barlyǵy 406 065 adam juqtyrǵan. Ótken táýlikte koronavırýstan 29 naýqas kóz jumdy, qaıtys bolǵandardyń jalpy sany 3 187 adamǵa jetti.

Úndistanda 18 qarashada tańerteń koronavırýstyń 11 919 jańa jaǵdaıy tirkeldi, bul jyl basynan beri indet juqtyrǵandar sanyn 34 478 517-ge deıin arttyrdy. Aýrýshańdyq kórsetkishi 16,8% qurady, sońǵy táýlikte elde 470 adam ınfektsııa saldarynan qaıtys boldy, zardap shekkenderdiń jalpy sany 464 623 adamǵa jetti.