Normatıvtik-quqyqtyq akti jobalarynda 4 myńǵa jýyq jemqorlyq faktory anyqtalǵan – agenttik

NUR-SULTAN. QazAqparat – Memlekettik organdarda jemqorlyqqa alyp kelýi múmkin normatıvtik-quqyqtyq aktiler (NQA) jobalaryndaǵy negizgi faktorlar jarııalandy, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń málimetinshe, elimizde NQA jobalaryna sybaılas jemqorlyqqa qarsy ýaqtyly jáne sapaly qorytyndylar daıyndaý úshin jurtshylyq arasynan joǵary kásibı sarapshylyq áleýet qalyptastyrylǵan. Qaıta uıymdastyrylǵan konkýrstyq irikteý nátıjesinde buryn bekitilgen 93 sarapshydan turatyn tizilim 39 jańa sarapshymen tolyqtyrylǵan.

Atalǵan sarapshylardyń biri - Ǵ.Saparǵalıev atyndaǵy ǴZI basshysy Sultan Álimjanovtyń aıtýynsha, memlekettik organdardan sybaılas jemqorlyqqa qarsy ǵylymı saraptamaǵa NQA jobalary kóp túsip jatyr.

Qazirgi tańda 2 400-den astam NQA jobasyna qatysty qorytyndy shyǵarylǵan. Onyń ishinde 1 023 NQA jobasynda jemqorlyqqa alyp kelýi múmkin 4 myńǵa jýyq faktor bolǵan. Olardy joıý boıynsha usynymdar berildi.

Aralyq nátıje kórsetkendeı, sybaılas jemqorlyq táýekelderiniń negizgi faktorlary:

- dıskretsııalyq ókilettikterdiń keńdigi (33%);

- ekiushty tujyrymdaý (18%);

- tıesili quqyqty iske asyrý úshin tulǵaǵa qoıylatyn joǵary talaptar (15%);

- quqyqtyq olqylyqtar (10%);

- quqyq normalarynyń qaıshylyqtary (10%).

«Taldaý kórsetkendeı, sybaılas jemqorlyqtyń negizgi normalary áleýmettik qamsyzdandyrý, qarjy, salyq jáne medıtsınalyq zańnama salasyndaǵy NQA jobalarynda qamtylǵan» - dedi Sultan Álimjanov.