Nobel syılyǵynyń ıegerleri Astanaǵa jınalady

5-6 qazan kúnderi Astanada ǵylym men bilimge qumar oqymystylardyń basyn qosatyn Nobel Fest jıyny ótedi, dep habarlaıdy QazAqparat.

Bul basqosýǵa álemniń túkpir-túkpirinen ǵylymnyń kórnekti tulǵalary – Nobel syılyǵynyń, ǵylymı «Oskar» syılyǵynyń laýreattary, zertteýshiler, ázirleýshiler, fýtýrologtar jáne basqa da ónertapqyshtar keledi.

«Festıval baǵdarlamasy jasandy ıntellektten bastap klımattyń ózgerýine, ekonomıkanyń bolashaǵyna, startaptar men eńbek naryǵyna, ǵylymnyń jańa perspektıvalary men adamzattyń bolashaǵyna deıingi keń aýqymdy taqyryptardy qamtıdy», - dep jazdy uıymdastyrýshylar.

Úzdik spıkerler ártúrli salalardaǵy ózekti taqyryptardy talqylaıdy.

Ekonomıka boıynsha Nobel syılyǵynyń laýreaty, álemniń úzdik 3 ekonomısiniń biri Djeıms Hekman «Damý ústindegi elde orta tapty qalaı qurýǵa bolady?» degen taqyrypta sóz sóıleıdi, sonymen qatar álemdi jaýlap alǵan jasandy ıntellekt taqyrybyndaǵy pikirtalasqa qatysady.

Dál sol dıskýrsqa Nobel Beıbitshilik syılyǵynyń laýreaty, klımat jáne turaqty damý boıynsha №1 sarapshy Rae Kvon Chýng ta atsalysady. Sonymen qatar, festıvalde ol «+1,5 gradýs. Álemniń quldyraýyn toqtatýǵa úlgeremiz be?» degen saýalǵa jaýap beredi.

Álemge áıgili fýtýrologtar bizdiń bolashaqqa degen senimimizdi ári qorqynyshymyzdy talqylaıdy: Gerd Leonhard, ınnovatsııadaǵy TOP 3 yqpaldy oqymystylardyń biri (Wired), «Tehnologııa adamdarǵa qarsy» bestselleriniń avtory, sondaı-aq SAP Martın Vezovskıdegi Future Hub jetekshisi.

Sılıkon alqabynyń gýrýsy, joǵary tehnologııalar salasyndaǵy eń yqpaldy qyryq ǵalymnyń biri (TIME Tech 40 boıynsha) Vıvek Vadhva únemi ózgeretin ortada klassıkalyq bıznesti ne kútip turǵany týraly pikirtalasqa qatysady.

Al álemdegi eń yqpaldy avtokólik dızaıneri, Mini Cooper, BMW X5, Ferrari F430, Maserati dızaın kontseptsııalaryn jasaýshy, Frank Stıvenson dızaınynyń (FSD) negizin qalaýshy Frenk Stıvenson avtomobıl ónerkásibi men ónerkásiptiń bolashaǵy týraly áńgimeleıdi. Dızaın tendentsııalary týraly aıtady.

Aıta keterligi, festıval qonaqtary ǵylymmen qatar ónerdi de tamashalaıdy. Nobel festıvali kezinde tanymal qazaqstandyq pıanıst Ratovıchtiń aýqymdy qoıylymy uıymdastyrylady.