Nıjat Rahımov Olımpıada medalinen aıyrylýyna qatysty pikir bildirdi
Sportshynyń sózinshe, onyń usynǵan dálelderi múlde qabyldanbaǵan.
«Dostar, Naýryz merekesi kúnderi dopıngke qarsy CAS departamentiniń 2016 jyly alynǵan baqylaý synamasyna qatysty sheshimi kóńilimdi túsirip jiberdi. Byltyr tamyz aıyndaǵy tyńdaýlar kezinde ol jaǵdaıǵa esh qatysym joq ekenin aıttym. Biraq, ókinishke qaraı, arbıtr dálelderimdi qabyldamapty», - dep jazdy Instagram-daǵy paraqshasynda Nıjat Rahymov.
Sportshy synama alǵan mamandardyń áreketine quqyqtyq baǵa berilmegenin de jetkizdi.
«Osy jumysqa jaýapty bolǵan adamdardyń áreketine baǵa berilmegeni ókinishti. Negizi suraqtyń bári solarǵa jáne olardyń basshylaryna qoıylýy kerek. Olardyń qoly taza emes ekenin ýaqyt kórsetti ǵoı. Suraq kóp, biraq jaýap joq. Sondyqtan men osy sheshimge úzildi-kesildi qarsymyn», - dep jazdy sportshy jelidegi paraqshasynda.
Onyń aıtýynsha, Olımpıada oıyndary kezinde alynǵan synamaǵa qatysty eshqandaı másele týyndaǵan joq. Soǵan qaramastan, altyn medaldi alyp qoıýǵa sheshim shyǵaryldy.
«Sol sebepti men bul sheshimge aryzdanýǵa múddelimin», - dep jazdy Nıjat Rahımov.
Buǵan deıin aýyr atlet Nıjat Rahımov Olımpıada altynynan aıyrylyp, 8 jylǵa sporttan shettetilgeni týraly jazǵan bolatynbyz.