Nıkol Pashınıan Joǵary EEK otyrysyn qorytyndylady

NUR-SULTAN. QazAqparat -Joǵary Eýrazııalyq ekonomıkalyq komıssııa otyrysynyń kún tártibine shyǵarylǵan barlyq másele boıynsha ortaq kelisimge qol jetkizildi. Bul týraly búgin elordada ótken Joǵary EEK otyrysynan keıingi brıfıngte Armenııa Premer-Mınıstri Nıkol Pashınıan aıtty, dep habarlaıdy QazAqparat tilshisi.

«Biz Joǵary Eýrazııalyq ekonomıkalyq keńes otyrysyn aıaqtadyq. Máselelerdiń keń aýqymyn talqyladyq jáne kún tártibindegi barlyq derlik máseleler boıynsha kelisimge keldik. Bul EAEO-nyń mereıtoılyq otyrysy. Eýrazııalyq ıntegratsııa týraly ıdeıanyń usynylǵan sátinen 25 jyl jáne EAEO qurý týraly shartqa qol qoıylǵan ýaqyttan beri 5 jyl ótti. Bul nyshandyq máni bar data jáne bul kezdesýdiń Qazaqstan elordasynda ótýiniń sımvoldyq máni bar», - dedi ol.

Armenııa Úkimet basshysy otyrysqa shyǵarylǵan keıbir máselege qatysty áli de kelisý jáne naqtylaý jumystary júrgizilýi qajet ekendigin atap ótti. Bul baǵyttaǵy jumystardy aldaǵy ýaqytta EAEO-ǵa múshe memleketterdiń Úkimetteri júrgizetin bolady.

«Qazirgi ýaqytta EAEO-nyń syrtqy ekonomıkalyq baılanystaryn keńeıtý óte mańyzdy. Búginde EAEO-nyń Sıngapýrmen, Mysyrmen, Serbııamen, Izraılmen, Úndistanmen kelissózderi júrip jatyr. Menińshe, bul EAEO elderi úshin óte mańyzdy baǵyttar. Sebebi EAEO elderiniń bıznesi úshin múmkinshilikti shynaıy keńeıtedi»,- dedi Nıkol Pashınıan.

Sondyqtan onyń aıtýynsha, búgingi otyrys barysynda Eýrazııalyq ekonomıkalyq komıssııa joǵaryda atalǵan barlyq baǵyttar boıynsha jumysty jandandyrýǵa tapsyrma berilgen.

«Bıylǵy jyly biz EAEO men seriktes elder arasynda keminde eki kelisimge qol qoıatyndyǵymyzǵa úmittenemin. Bul baǵyttaǵy jumystar odan ary da jalǵasady. Tolyqtaı alǵanda, Nur-Sultanda ótken EAEO otyrysyn sátti boldy deýge negiz bar jáne aldaǵy ýaqytta da osy rýhta jumys isteımiz», - dedi ol.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Qazaqstan Prezıdenti qasym-Jomart Toqaev, Qyrǵyz Respýblıkasynyń Prezıdenti Sooronbaı Jeenbekov, Belarýs Respýblıkasynyń Prezıdenti Aleksandr Lýkashenko, Reseı Prezıdenti Vladımır Pýtın, Armenııa Respýblıkasynyń Premer-mınıstri Nıkol Pashınıan, sonmen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysty.

Jalpy otyrys barysynda Memleket basshylary EAEO damýynyń ózekti máseleleri men bolashaǵyn talqylady. Atap aıtqanda, tsıfrlyq damýdyń, Odaqtyń halyqaralyq qyzmetiniń kún tártibinde turǵan máseleleri, sondaı-aq 2019-2020 jyldarǵa arnalǵan makroekonomıkalyq saıasattyń negizgi baǵdarlary qarastyryldy. Sammıt sońynda Joǵary Eýrazııa ekonomıkalyq keńeske múshe memleketter basshylary birqatar halyqaralyq qujattarǵa qol qoıdy.