Nıkol Pashınıan Túrkııamen shekarasyn ashý máselesin qarastyryp jatyr

EREVAN. QazAqparat – Armenııa premer-mınıstri Nıkol Pashınıan vedomstvolarǵa armıan-túrik shekarasyn ashý jónindegi ýaǵdalastyqty iske asyrý úshin tıisti túrik qurylymdarymen jumysty úılestirýdi tapsyrdy. Bul týraly ol búgingi úkimet otyrysynda málim etti, dep habarlaıdy QazAqparat menshikti tilshisi.

Armenııa men Túrkııanyń arnaıy ókilderi osy jyldyń 1 shildesinde Venada úshinshi elderdiń azamattary úshin shekarany ashý jáne elder arasynda júkterdiń tikeleı avıatasymalyn júzege asyrý týraly ýaǵdalastyqqa qol jetkizgen bolatyn.

«Bizdiń vedomstvolardyń tıisti túrik qurylymdarymen úılesimdi jumys isteýi mańyzdy. Sebebi, saıası kelisimder óz aldyna, olardyń oryndalýy osy jumysqa baılanysty. Meniń tapsyrmam – qol jetkizilgen ýaǵdalastyqty iske asyrý úshin jumysty úılestirý», - dep atap ótti Nıkol Pashınıan úkimet otyrysynda.

Armenııa men Túrkııa ortaq shekara bolǵanyna qaramastan, dıplomatııalyq qarym-qatynas ornatpaǵan. Eki el arasyndaǵy shekara 1993 jyldan beri jabyq. Qazirgi ýaqytta qos tarap arasyndaǵy júk tasymaly Grýzııa aýmaǵy arqyly ótedi.

2021 jyly Armenııa men Túrkııa aradaǵy qatynastardy qalypqa keltirý jónindegi kelissózder úshin arnaıy ókilder taǵaıyndady. Kelissózderde armıan tarapyn Parlament vıtse-spıkeri Rýben Rýbenıan, Túrkııa tarapynan eldiń AQSh–taǵy burynǵy elshisi Serdar Kylych belgilengen. Búgingi tańda arnaıy ókilder kelissózderdiń tórt raýndyn ótkizdi. Kezdesýler Máskeý men Venada ótti.