Nıgerııadaǵy sý tasqyny úsh aıda 321 adamnyń ómirin qıdy

<p>ASTANA. KAZINFORM &ndash; Sý tasqynynan eldegi 36 shtattyń 34-i zardap shekti. 217 eldi mekendi qamtyǵan tabıǵı apattan barlyǵy 1,4 mln-ǵa jýyq adam zardap shekti, dep habarlaıdy <a href="https://dailytrust.com/flood-kills-321-in-34-states-affects-1-4m-people/" target="_blank" rel="noopener">Daily Trust.</a></p>

Sý tasqyny memleket jáne jeke menshik ıelikteri aıtarlyqtaı shyǵyn ákeldi. 280 myńnan astam turǵyn úı men 258 myń ga egis alqaptary qırady. 

2024 jyly apat ádette jaýyn-shashyn mol túsetin eldiń ońtústiginde ǵana emes, sonymen qatar qurǵaq jáne shóldi soltústikte de oıran saldy. Bolashaqta sý tasqynynyń osyndaı aýyr zardaptaryn boldyrmaý úshin bılik Nıgerııanyń ózenderi, kólderi jáne basqa da sý qoımalaryn túgendeýdi buıyrdy. 

Jańbyrly maýsymnyń aıaqtalýy Batys Afrıkanyń kóptegen elinde buryn-sońdy bolmaǵan sý tasqynyna ákeldi. Nıgerııa, Chad, Malı, Gvıneıa, Nıger, Kamerýn, Gana jáne Lıberııada 4 mln-nan astam adam zardap shekti. 

Sarapshylar joıqyn sý tasqynynyń sebepterin jahandyq klımattyń ózgerýimen baılanystyryp otyr. Halyqaralyq Qyzyl Krest komıtetiniń (HQKK) málimetinshe, Saheldegi ortasha temperatýra basqa eldermen salystyrǵanda bir jarym ese jyldam kóterilip otyr. 

Buǵan deıin Ispanııada nóser jańbyr saldarynan bolǵan sý tasqynynan qaza tapqandar sany 158-ge jetkenin jazǵan bolatynbyz.