Nıgerııada «Boko Haram» lańkesteriniń shabýylynan 80 adam qaza boldy

<p>ASTANA. KAZINFORM &ndash; Nıgerııada &laquo;Boko Haram&raquo; lańkestik toby Iobe shtatyndaǵy Mafa aýylyna shabýyl jasap, 80-ge jýyq adamnyń ómirin qıdy. Bul týraly "<a href="https://www.theguardian.com/world/article/2024/sep/03/at-least-80-dead-after-suspected-boko-haram-attack-in-nigeria" target="_blank" rel="noopener">The Guardia</a>n" habarlady.</p>

Basylymnyń málimetinshe, 1 qyrkúıek kúni saǵat 16:00 shamasynda myltyq pen oq-dárimen qarýlanǵan 150-ge jýyq «Boko Haram» lańkesteri 50-den astam mototsıklmen úkimet keńsesine shabýyl jasaǵan.

– Olar kóptegen adamdardy óltirdi, kóptegen dúkender men úılerdi órtep jiberdi. Biz shabýylda qaza tapqandardyń naqty sanyn áli anyqtaǵan joqpyz, – dedi jergilikti bılik ókilderi.

Polıtsııa ókiliniń aıtýynsha, shabýyldyń maqsaty Mafa sarbazdary Boko Haramnyń eki sodyryn óltirgeni úshin kek alý bolǵan.

Aqparat úshin, «Boko Haram» top músheleri Nıgerııada 2002 jyldan beri belsendilikpen Batys yqpalyna qarsy kúresip keledi. Sońǵy jyldary qozǵalys áreketteri odan ári radıkaldy sıpatqa ıe bolýda. Bul toptyń lańkesteri osy jyldar ishinde myńdaǵan adamnyń ómirin qıdy. Atap aıtqanda, «Boko Haram» jáne basqa da toptar Nıgerııanyń soltústik-shyǵysynda 15 jyldan beri 40 myńnan astam adamdy óltirdi. Ortalyq jáne soltústik-batys Nıgerııanyń halqy kóp jyldar boıy halyq arasynda «bandıt» degen atpen belgili bul qylmystyq toptardan zardap shegip keledi.

Aıta keteıik, mamyr aıynda «Boko Haram» ıslamshyl tobynan bolýy múmkin qarýly sodyrlar Nıgerııanyń ortalyǵyndaǵy Nıger shtatynda Kýchı aýylyn oırandap, 160 adamdy urlap áketken bolatyn.