Nıgerııa týmasy N.Nazarbaevqa qazaq tilinde án salyp berdi
Qazaqstanda 5 jyl turyp jatqan ónertanýshy jáne mýzykant Danıel Djeıms Danladı-Bvaı Qazaqstan halqy Assambleıasy keńesiniń «Táýelsizdik. Kelisim. Bolashaǵy birtutas ult» atty XXIV sessııasynda qazaq tilinde án shyrqap berdi.
«Meniń ákem nıgerııalyq, anam - orys. Qazaqstanda 5 jyl turyp jatyrmyn. Men Qazaqstan azamatymyn. T.Júrgenov atyndaǵy Ulttyq óner akademııasynda oqımyn», - dedi Danıel Bvaı.
«Nıgerııalyq bizde áli bolǵan emes, tamyryńdy osynda jaı», - dep qaljyńdady N.Nazarbaev. «Bastap ta kettim», - dedi Danıel qazaq tilinde. - Qazaqta «qara» degen qasıetti uǵym bar. Tóbede kók aspan, tómende qara jer bolsa, onyń ústinde beıbitshilik pen tatýlyqtyń qara shańyraǵy - Qazaqstan! Qazaqtar talaı ýaqyt boıy Táýelsizdikti ańsap keldi, biraq bul armanǵa Siz qol jetkizdińiz, Prezıdent myrza».
«Men tańdanamyn, eger ol qazaqshaǵa sýdaı bolsa, qazaqstandyqtardyń ózderinde qandaı kedergi bar?», - dedi Elbasy nıgerııalyq «qara domalaqtyń» qazaqshasyna tańdanyp.
Danıel Bvaı Prezıdentpen áńgimesinde bar ómirin ónerge arnaıtyndyǵyn aıtyp qaldy. «Dombyrada oınaımyn, asaba da bolam keıde. Ulttyq ánderdi de bilem, bireýin aıtyp bereıin», - dep qolqa saldy ol.
Qazaqstan Prezıdenti Nursultan Nazarbaevqa Almatyda turatyn Nıgerııa týmasynyń qazaq tilinde oryndaǵan áni unady. Sońynda, Memleket basshysy Danıelge sáttilik tilep, aq batasyn berdi.