Nıgerdegi búlikshiler bılikten shettetilgen prezıdentti óltiremiz dep qorqytty

NIAMEI. QazAqparat – Batys Afrıka elderiniń ekonomıkalyq qaýymdastyǵy (EKOVAS) Nıger shekarasyna jaqyn jerde rezervtegi áskerlerdi qosýdy talap etti. Qaýymdastyq shekaralardy jabý, saparlarǵa qatań tyıym salý jáne konstıtýtsııalyq tártipti qalpyna keltirýge kedergi jasaıtyn adamdar aktıvterin toqtatý sharalaryn qabyldaıtynyn málimdedi, dep habarlaıdy QazAqparat euronews.com-ǵa silteme jasap.

Buryn Nıgerdegi bılikti basyp alǵan búlikshiler kórshi memleketterdiń áskerı aralasýy jaǵdaıynda bılikten shettetilgen prezıdent Mohamed Bazýmdy óltiremiz dep qorqytty.

Batys aqparat agenttikteriniń habarlaýynsha, búlikti uıymdastyrýshylar mundaı eskertýdi 7 tamyzda Nıgerge kelgen AQSh Memlekettik hatshysy birinshi orynbasarynyń m.a. Vıktorııa Nýlandqa jasady. Ol eldegi demokratııalyq tártipti qalpyna keltirý jolyn usyndy, biraq búlikshiler «onsha qyzyǵýshylyq tanytpady».

Eske sala ketsek, Nıgerdegi áskerıler ulttyq telearna arqyly prezıdent Mohamed Bazýmdy bılikten ketirgenin jarııalady.

Olar sondaı-aq konstıtýtsııa men barlyq memlekettik ınstıtýttar jumysy toqtatylyp, eldiń batys Afrıkadaǵy shekaralary jabylady dep habarlady. Teledıdardan general-polkovnık Amadý Abdýrahman sóıledi.

«Biz, qorǵanys jáne qaýipsizdik kúshteri ózderińiz biletin rejımdi taqtan taıdyrýǵa bel baıladyq», - dedi general teledıdar arqyly sóılegen sózinde. – Bul – qaýipsizdik salasyndaǵy jaǵdaı nasharlap, ekonomıkalyq jáne áleýmettik basqarýdyń tómendeýine baılanysty qabyldanǵan sheshim». Onyń aıtýynsha, mınıstrlik basshylary kúndelikti mindetin atqara beredi.

«Barlyq syrtqy seriktesterden máselege aralaspaýdy suraımyz. Jaǵdaı turaqtanǵansha teńiz jáne áýe shekaralary jabylady», – dedi ol.

Afrıkanyń Nıger elindegi oqıǵalar álemdik buqaralyq aqparat quraldarynyń nazarynda. Qyzyǵýshylyqtyń artýy Nıgerdiń Eýropalyq Odaq ımporttaıtyn ýrannyń úlken qoryna, sondaı-aq Sahel aımaǵyndaǵy jalpy qaýipsizdik jaǵdaıyna baılanysty. Tolyǵyraq QazAqparat HAA-nyń taldaý materıalynan oqı alasyz.