Nıderlandyda komendanttyq saǵat tártibin buzǵandar jazalandy

NUR-SULTAN. QazAqparat - Nıderlandyda búginnen bastap komendanttyq saǵat engizildi. Birinshi túni tártip buzǵan 25 adam qamaýǵa alyndy, dep jazady 24.kz.

Ýrk aýylyndaǵy jastar koronavırýsqa test tapsyratyn ǵımaratty órtegen. Buzaqylar polıtseılerge janǵysh zattar pen tas laqtyryp, birneshe kólikti qıratqan.

Saqshylar búkil el boıynsha 3600-den astam adamǵa 95 eýrodan aıyppul saldy. Al el astanasy Amsterdamda jurt jym-jyrt. Munda oıyn-saýyqtan kóz ashpaıtyn tutas bir aýdannyń kósheleri bos qalǵan.

Nıderlandyda komendanttyq saǵat Ekinshi dúnıejúzilik soǵystan keıin alǵash ret engizilip otyr. Bul elde 9 aqpanǵa deıin keshki saǵat 9-dan tańǵy 4 jarymǵa deıin dalada beısaýat júrýge bolmaıdy.