Nıderlandyda karantınge qarsy sherýdegi tártipsizdikten keıin Rotterdam meri halyqqa úndeý jasady

BRıÝSSELЬ. QazAqparat – Rotterdam meri 25 qańtarda Nıderlandynyń birneshe qalasynda bolǵan tártipsizdikterden keıin áleýmettik jeli arqyly halyqqa úndeý jasady, dep habarlaıdy QazAqparat menshikti tilshisi.

Rotterdam basshysy Ahmet Ábýtalıp Twitter-degi paraqshasynda qalanyń kommýnaldyq qyzmetteri megapolıstiń búlingen nysandaryn qaıta qalpyna keltirýge májbúr ekenin jazdy.

Eske sala keteıik, Nıderlandyda dúısenbi kúni keshke tártipsizdikter oryn alǵan bolatyn. Júzdegen adam Amsterdamdaǵy koronavırýsqa baılanysty shekteý sharalaryna narazylyq bildirdi. Sherýshiler terezelerdi syndyryp, avtobýs aıaldamalaryn qıratyp, dúkenderdi tonaǵan. Nátıjesinde Gollandııa polıtsııasy 150-den astam adamdy ustady, olardyń eń kishisi 14 jasta.

«Qalańyzda tártipsizdik uıymdastyrǵan jaqsy ma? Kásipkerlerge shyǵyn keltirgen durys pa? Urlanǵan zattarǵa toly sómkeniń janynda oıaný sizderge unaı ma?» – dep surady A.Ábýtalıp búlikshilerden.

Rotterdam meri qaýipsizdik maqsatynda ata-analardan balalar men jasóspirimderdi baqylaýdy suraıdy.

«Bul tártipsizdikterdiń narazylyqtarǵa nemese bostandyq úshin kúreske eshqandaı qatysy joq. Biz vırýsty birge jeńýimiz kerek, óıtkeni bul – ózimizge bostandyqty qaıtarýdyń jalǵyz joly. Biz birneshe buzaqyǵa bola alǵan betimizden qaıtpaımyz», - dedi Nıderlandynyń «CDA» partııasynyń jetekshisi Vopke Hýkstra.

Avtor Arnur Raqymbekov