Nıderlandtyq ınvestor eki kúnde beriletin qorytyndyny eki aı kútti

AQTÓBE. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti sheteldik ınvestorlarǵa kómektesti. Eki aı kútken memlekettik saraptama qorytyndysy eki kúnde berildi, dep habarlaıdy QazAqparat tilshisi.

Aqtóbede bıznestiń kedergisiz jumys isteýine baǵyttalǵan «Protecting business and Investments» jobasy sátti iske asyp jatyr. Túrkııa, Qytaı, Slovakııa, Shveıtsarııa, Reseı, Germanııa, Nıderlandy sekildi elderdiń ınvestorlary sybaılas jemqorlyqtyń aldyn alý maqsatynda jobaǵa endi. 

«Green Capital Kazakhstan» JShS jylyjaı qurylysy úshin qajetti memlekettik saraptama qorytyndysyn eki aıǵa jýyq ýaqyt ala almaı júrdi. Jumys nátıjesinde eki kúnde berildi. «Gazprocessing» kompanııasynyń ótinishi de óz sheshimin tapty. Kompanııa «Qazhrom» TUK AQ terrıtorııasy arqyly elektr togyn ótkize almaı kelgen. Al «Aqsý Mebel» JShS sheteldik jumys kúshine kvota aldy»,- dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamentiniń basshysy Rasýl Medetov.

Statıstıkalyq málimetke súıensek, sheteldik jáne qazaqstandyq ınvestorlardy jemqorlyqtan qorǵaý úshin quny 463,7 mlrd teńge bolatyn 23 kelisimge qol qoıylǵan. Barlyǵy 23 ótinish túsip, onyń 20-sy tez sheshimin tapty. Al úsh másele baqylaýǵa alyndy.