Nıderlandta ózen sýy arnasynan asyp, halyq ábigerge túsip jatyr

<p>Tolassyz jaýǵan jańbyr saldarynan Nıderlandtyń shyǵys jáne ońtústik oblystarynda iri ózenderdegi sý deńgeıi kóterildi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.&nbsp;</p>

Nıderlandtyń Infraqurylym jáne sý sharýashylyǵy mınıstrligine qarasty «Rijkswaterstaat» agenttiginiń habarlaýynsha, eldiń keıbir aımaqtarynda sý deńgeıiniń kóterilýi qıyndyq týdyrýy múmkin.

Osyǵan baılanysty Nıderlandtyń shyǵysyndaǵy Deventer mýnıtsıpalıteti Eıssel ózenindegi sý deńgeıi tez kóterilip kete me dep alańdap, daıyndalyp jatyr.

«Aqyrynda sý deńgeıi qatty kóterilgeni sonshalyq, qala ortalyǵyn sý basyp qala ma degen qaýip bar», - dep habarlady jergilikti BAQ.

«Búgin tańerteń 6.15-te Deventerde sý deńgeıi 6.21 metr boldy. Bul Eıssel tolyp ketedi dep eseptelgen 6,30 metr deńgeıden sál ǵana tómen. Mýnıtsıpalıtet qum salynǵan qapshyqtar arqyly bul mańyzdy núkteni sál joǵarylatty. Bul Eısseldi ustap turý úshin jetkilikti bolady dep úmittenemiz», - deıdi mýnıtsıpalıtet ókili.

Ózen sýy arnasynan asý saldarynan birneshe aýdandy, jaqyn mańdaǵy aýyldardy sý basty. Qoryqtaǵy birneshe jylqyny sýdan qutqarýǵa týra keldi.

Drentede jergilikti sý departamentiniń qyzmetkerleri arnalar men aryqtardyń tolyp ketýin toqtatý úshin táýlik boıy jumys istep jatyr.