Nıderlandta Naýryz meıramyna túrli sharalar uıymdastyryldy
Vestbrýk parkte ashyq aspan astynda Nıderland jáne kórshiles Belgııanyń túkpir-túkpirinde turatyn júzdegen qazaqstandyqtar, gollandııalyq dostar men seriktester, sondaı-aq TMD elderinen kelgen qonaqtar jınaldy, dep habarlaıdy QazAqparat QP Syrtqy ister mınıstrliginiń baspasóz qyzmetine silteme jasap.
Jınalǵandar aldynda Qazaqstan Elshisi Asqar Jumaǵalıev quttyqtaý sózin sóıledi.
«Men bul kúni sizdermen bolǵanyma óte qýanyshtymyn. Naýryz – biz úshin erekshe mereke. Naýryz – jańa bastamalar merekesi. Jańa jyldyń basy, jańa úmit jáne «Jańa Qazaqstan». Barshańyzǵa beıbit aspan, shańyraqtaryńyzǵa yntymaq pen bereke tileımin», - dedi Elshi.
Іs-sharanyń qurmetti qonaǵy retinde EQYU-nyń Az ulttar isteri jónindegi joǵarǵy komıssary Qaırat Ábdirahmanov qatysty.
«Halyqaralyq qyzmetker retinde elimniń osyndaı joǵary deńgeıde is-sharany uıymdastyrǵanyna óte qýanyshtymyn. Naýryz meıramy aýyzbirshilikpen, birlikpen, beıbit qatar ómir súrýmen beıneleıdi. Búgingi tańda maǵan EQYU-nyń Az ulttar isteri jónindegi Joǵarǵy komıssary retinde osy naqty mysaldar arqyly halyqaralyq qoǵamdastyqqa, sondaı-aq Nıderlandy qoǵamyna bizdiń kópultty, kópkonfessııaly qoǵamdarymyzdyń beıbit ómir súrýin qamtamasyz etýdiń qanshalyqty qajetti ekenin kórsetý óte mańyzdy. Bul merekeniń maqsaty oryndaldy dep oılaımyn. Mádenıetimizdiń baılyǵyn jáne salt-dástúrleriniń tereńdigin kórsetý arqyly búgingi tańda qoǵamdyq ómirimizdegi tereń ózgeristerge baılanysty reformalar jolynda ekenimizdi kórsetý óte mańyzdy. Osy rette, quttyqtaý sózimde qazaqstandyqtardy «Jańa Qazaqstan» úshin birge adal eńbegimizben qyzmet etýge shaqyrdym», - dep atap ótti ol.
Eýropanyń ár túrli elderinen arnaıy kelgen otandastarymyz, opera ánshisi Áıgúl Shámshidenova, halyqaralyq konkýrs laýreaty, dombyrashy Esenǵalı Qumarov, Lej qalasynyń Koroldik konservatorııa stýdenti, skrıpkashy Názikgúl Janazarova ózderiniń shyǵarmashylyq kórsetilimderin aýdıtorııaǵa tartý etti.
Ásirese, «Qoshaqanym» ánin oryndaǵan jáne «Qara jorǵa» bıin bılegen qazaqstandyq búldirshinderiniń óneri dýmandy qoshemetke bólendi. Sonymen qatar, Qazaqstan Elshiligi qonaqtar úshin asyq atý, toǵyzqumalaq jáne arqan tartý ulttyq oıyndary boıynsha týrnır ótkizdi. Merekeni estelik sýretke túsirgisi keletinder úshin ulttyq naqyshtaǵy qazaq halqynyń turmystyq zattary salynǵan kıiz úı fotoaımaǵy uıymdastyryldy. Qonaqtar kamzol men shapan kıip, sondaı-aq uly Abaıdyń qara sózderimen tanysty.
Іs-sharaǵa kelgen gollandııalyqtar alǵash ret qazaq taǵamdardyń dámin kórip, joǵary baǵalaǵan bolatyn. Sondaı-aq Qazaqstanǵa kelip, qazaq mádenıetimen jáne dástúrlerimen jaqynyraq tanysýǵa nıet bildirdi.