Nıderlandta búginnen bastap qatań lokdaýn engizilip, dúkender jabylady

BRıÝSSELЬ - GAAGA. QazAqparat – Dúısenbi kúni Nıderland premer-mınıstri Mark Rıýtte koronavırýspen kúres boıynsha jańa sharalardyń engizilýine baılanysty el turǵyndaryna úndeý jasady, dep habarlaıdy QazAqparattyń menshikti tilshisi.

Germanııadan keıin Nıderland úkimeti bıylǵy jyldyń 15 jeltoqsanynan bastap «kúsheıtilgen lokdaýn» engizedi.

Atap aıtqanda, azyq-túlik, mádenı jáne qoǵamdyq mekemelerdi qospaǵanda, dúkender jumysyn toqtatady.

Sonymen qatar, Nıderland premer-mınıstri kem degende 2021 jyldyń naýryz aıynyń ortasyna deıin turǵyndardy shetelge sapar josparlamaýǵa shaqyrdy.

«Nıderlandqa Eýroodaq pen Shengen aımaǵyna kirmeıtin memleketterden kelgen azamattar koronavırýs ınfektsııasynyń teris nátıjesi bar test usynýy kerek» dedi úkimet basshysy.

Bul talap Nıderland azamattaryna, EO-nyń basqa azamattaryna jáne olardyń otbasy múshelerine qoldanylmaıdy.