Nıderlandta 15 mln eýroǵa satyp alynǵan koronavırýs vaktsınasyna suranys joq

BRıÝSSELЬ. QazAqparat – Nıderlad eli «Novavax» kompanııasy óndirgen koronavırýsqa qarsy 800 myń dozadan astam vaktsınany qoldanyp úlgermeýi múmkin. Sebebi preparattardyń jaramdylyq merzimi ótip ketedi. Bul týraly «QazAqparat» HAA-nyń menshikti tilshisi habarlaıdy.

Nıderland BAQ-tarynyń málimetinshe, el úkimeti koronavırýsqa qarsy kúres sheńberinde AQSh-tyń «Novavax» farmatsevtıkalyq kontserniniń 840 myń doza vaktsınasyn satyp alǵan. Alaıda, atalǵan preparat qoryna suranys bolmaıtyny boljanyp otyr.

Búgingi kúni Nıderlandta «Novavax» vaktsınasymen tek 655 adam egilgen, taǵy 329-y kezekte tur. Bul rette, preparattardyń deniniń jaramdylyq merzimi óte qysqa – 2022 jyldyń 31 tamyzyna deıin. Atalǵan partııanyń jalpy quny shamamen 15 mln eýrony quraıdy, dep jazady Trouw portaly.

2022 jyldyń 11 naýryzynan Nıderland turǵyndary «Novavax» preparatymen egilýge telefon arqyly jazyla alady. Azamattarǵa eki ekpeden salynady. Sol sebepti 840 myń vaktsına 420 myń adamǵa eseptelgen.

Osyǵan oraı eldiń Densaýlyq saqtaý mınıstrligi 420 myń dozany ózge elderge qaıtarymsyz maqsatta berýdi sheshti. Biraq jergilikti BAQ oǵan suranystyń bolatynyna kúmán keltirip otyr. Óıtkeni ózge memleketterde de atalǵan preparattar artylyp jatyr.