Nıderland eli Astanada «Qyzǵaldaq» músinin ornatty

ASTANA. QazAqparat - Astanadaǵy Botanıkalyq baqta Qazaqstan Respýblıkasy men Nıderland Koroldigi arasynda dıplomatııalyq qatynastyń ornaǵanyna 30 jyl tolýyna oraı «Qyzǵaldaq» músini ornatyldy. QazAqparat bul týraly Syrtqy ister mınıstrligine silteme jasap habarlaıdy.

Nıderland tarapy syıǵa tartqan «Qyzǵaldaq» músininiń saltanatty ashylý rásimi búgin ótti.

Sharaǵa QR Syrtqy ister mınıstriniń orynbasary Roman Vasılenko, Nıderlandtyń Qazaqstandaǵy Elshisi Andre Karstens, dıplomatııalyq korpýstyń, elorda ákimdigi men jurtshylyq ókilderi qatysty.

«Qazaqstan men Ortalyq Eýrazııa dalasy qyzǵaldaqtardyń tanylǵan otany bolyp tabylady. Búgingi tańda elimizdiń keń baıtaq jerinde jabaıy qyzǵaldaqtardyń 35 túrin kezdestirýge bolady. Sonymen qatar Nıderlandty de gúldermen, ásirese qyzǵaldaqtarmen baılanystyramyz.

Qyzǵaldaq – beıbitshilik, baqyt, bereke men jańarýdyń nyshany. Bul músin de Qazaqstan men Nıderland arasyndaǵy dástúrli dostyq pen ózara qoldaý rýhynda jyldan-jylǵa damyp kele jatqan áriptestikti aıqyndaıdy», - delingen QR SІM málimetinde.