Neımar Peleni basyp ozyp, Brazılııanyń úzdik surmergeni atandy

ASTANA. QazAqparat – Brazılııa quramasynyń shabýylshysy Neımar 2026 jylǵy álem chempıonatynyń irikteý kezeńinde Bolıvııamen ótken matchta qos goldyń avtory atandy, dep habarlaıdy QazAqparat tilshisi.

Neımar ulttyq qurama sapynda soqqan gol sanyn 79-ǵa jetkizip, bul kórsetkish jóninen ataqty «fýtbol koroli» Peleni (onyń esebinde 77 dop bar) basyp ozyp, Brazılııanyń úzdik surmergeni atandy.

Atalǵan oıynda Brazılııa Bolıvııany 5:1 esebimen oısyrata utty. 17-mınýtta Neımar 11 metrlik aıyp dobynan múlt ketti. Degenmen 24-mınýtta Rodrıgo esep ashsa, ekinshi taım basynda Rafınıa 2:0-ge jetkizdi. Sodan keıin Rodrıgo kózge tússe, 61-mınýtta Neımar mergendik tanytty. 78-mınýtta Bolıvııadan Vıktor Abrego jaýap qaıyrǵanymen, Neımar qosymsha ýaqytta match núktesin qoıdy.

Bıylǵy jazda Neımar saýdııalyq «Al-Hılıal» klýbyna alynǵan bolatyn. Ótken maýsymda Frantsııa chempıonatynda «PSJ» namysyn qorǵap, 13 gol, 11 nátıjeli pastyń avtory atandy. Sondaı-aq 31 jastaǵy shabýylshynyń 2013-2017 jyldary «Barselona» quramynda dop tepkeni belgili.

Eske sala keteıik, budan buryn Krıshtıaný Ronaldýdyń sport jolyndaǵy 850-inshi golyn soqqanyn jazǵan bolatynbyz.