Netanıahýǵa qastandyq uıymdastyryldy

<p>ASTANA. KAZINFORM &ndash; Izraılde premer-mınıstr Bınıamın Netanıahý, Qorǵanys mınıstri Ioav Gallant jáne Bas qaýipsizdik basqarmasynyń (Shın Bet) dırektory Ronen Baraǵa qarsy qastandyq josparǵa tosqaýyl qoıyldy. Joǵary laýazymdy sheneýnikti óltirýdi Iran josparlaǵan dep habarlaıdy <a href="https://www.jpost.com/israel-news/defense-news/article-820820" target="_blank" rel="noopener">Jerusalem Post.</a></p>

Habarlamaǵa sáıkes, Irannyń operatsııasyna Túrkııada turatyn ızraıldik kásipkerdi paıdalý josparlanǵany aıtylady.

Sáýir aıynda túrik azamattary Andreı Aslan men Gúneıd Aslan qarjy operatsııalaryn júrgizý úshin ızraıldik kásipkermen baılanysqa shyqqan. Olar ony Túrkııanyń Samandag qalasyna Irannyń eki ókilimen kezdesýge shaqyrǵan. Kezdesý mamyr aıynda ótken. Izraıldik kásipker bastapqyda bir mıllıon dollar talap etken.

Keıinirek ızraıldik kásipker Mossad agentin «qos agentke» aınaldyrýdy qosa alǵanda, jospardy júzege asyrý, jumsalatyn qarjy, logıstıka jáne qarý-jaraq úshin 5000 eýro alǵan. Sondaı-aq kásipkerden Irannyń nusqaýlaryna sáıkes kelmeıtin mıssııalardy oryndaýdan bas tartqan Izraıl azamattaryn qorqytýdy surady, delingen habarlamada.

Bul áreketti ızraıldik kásipkerdiń jasaǵany nemese jasamaǵany áli belgisiz. Oǵan bul aıyp 19 qyrkúıekte taǵylǵan.