Netanıahý: Izraıl Tegerannyń óz terrıtorııasyna jasaǵan soqqylaryna jaýap beredi

<p>ASTANA. KAZINFORM &ndash; Izraıl premer-mınıstri Bınıamın Netanıahý seısenbi kúni keshke Izraılge ballıstıkalyq zymyranmen jappaı shabýyl jasaǵan Iran &laquo;úlken qatelik jasaǵanyn jáne onyń qunyn óteıtinin&raquo; málimdedi, dep habarlaıdy <a href="https://www.bbc.com/russian/articles/cq8xeg1nz8do" target="_blank" rel="noopener">BBC News</a>.&nbsp;</p>

«Iran úlken qatelik jasady, sol úshin jaýap beredi. Irandaǵy rejım bizdiń ózimizdi qorǵaýǵa jáne dushpandarymyzdan kek alýǵa bel baılaýymyzdy túsinbeıdi. Biz belgilegen erejeni ustanamyz: kim bizge shabýyl jasasa, biz oǵan shabýyl jasaımyz», — dedi ol. 

Izraıl armııasynyń baspasóz hatshysy Danıel Hagarı de Tegeran áreketiniń saldary aýyr bolatynyn málimdedi. Onyń aıtýynsha, Izraıl men Amerıkanyń áýe qorǵanysy júıeleri Irannan ushyrylǵan zymyrandarǵa qarsy tıimdi jumys istegen.

«Iran Taıaý Shyǵysty shıeleniske ıtermelep otyr. Búgingi oqıǵalardyń saldary bolady», — dedi ol.

Irannyń shabýylynan birneshe saǵat ótken soń Izraıl áskerıleri Beırýttegi «Hezbolla» nysandaryna jańa shabýyldar jasady.

AQSh prezıdenti Djo Baıdenniń ulttyq qaýipsizdik jónindegi keńesshisi Djeık Sallıvan Iran soqqylaryn «mańyzdy shıelenis» dep atap, Tegerannyń barlyǵy 200-ge jýyq ballıstıkalyq zymyran ushyrǵanyn habarlady (Irannyń memlekettik telearnasy keıinirek dál osyndaı sandy jarııalady). 

Sallıvan Izraıldiń nemese AQSh-tyń kek alý múmkindigi týraly túsinik berýden bas tartty, biraq amerıkalyq esmınetster Izraılge Iran zymyrandaryn atyp túsirýge kómekteskenin rastady.

Pentagon ókili Pet Raıderdiń brıfıngte málimdeýinshe, shabýyldy toıtarýǵa Jerorta teńizinde ornalasqan AQSh Áskerı-teńiz kúshteriniń eki esmınetsi qatysqan. 

AQSh áskeri seısenbi kúngi soqqylar Irannyń osy jyldyń sáýir aıynda Izraılge jasaǵan alǵashqy shabýylynan «eki ese úlken» ekenin málimdedi. AQSh prezıdenti Djo Baıden Vashıngton Izraıldi tolyǵymen qoldaıtynyn aıtty.

Baıdenniń aıtýynsha, onyń tikeleı nusqaýymen AQSh áskeri soqqy kezinde «Izraıldiń qorǵanysyna belsendi túrde qoldaý kórsetti».