Nesıesi bar sarbazdar ony 13 aıdan keıin áskerden kelgende tóleı alady

ASTANA. QazAqparat – Merzimdi áskerı qyzmetke shaqyrylǵan azamattyń nesıesi bolsa, ony tóleý 13 aıǵa keıinge aýysady. Qorǵanys mınstrligi bas shtabynyń uıymdastyrý-jumyldyrý jumystary departamentiniń aǵa ofıtseri Rýslan Tapashev osylaı málim etti, dep habarlaıdy QazAqparat tilshisi.

«Qazir merzimdi áskerı qyzmetke shaqyrylatyn jáne merzimdi áskerı mindetin atqaryp júrgen azamattardyń nesıesin keıinge qaldyrý máselesi kóp sóz bolyp jatyr. Osyǵan sáıkes, bizdiń Qorǵanys mınıstrligi men Qarjy narǵyn retteý jáne damytý agenttigi arasynda 2022 jyldyń 5 jeltoqsanynda memorandýmǵa qol qoıyldy. Soǵan saı is-qımyl algorıtimi bekitildi jáne qazir bul baǵytta tolyqqandy jumys júrgizilip jatyr. Endi áskerı qyzmetke shaqyrylǵan nemese ony ótkerýshi azamattarǵa áskerı bólim usynǵan anyqtama arqyly ekinshi deńgeıli bankter aldyndaǵy olardyń nesıesi keıinge qaldyrylady. Bul ýaqyt 13 aı dep kórsetilgen. Óıtkeni, áskerı mindetti óteý merzimi 12 aı. Al qosymsha 1 aı áskerden kelgennen keıin jumysqa ornalasýy úshin beriledi», - dep túsindirdi bas shtabtyń ókili.

Rýslan Tapashevtiń aıtýynsha, azamat áskerı bólimge barǵannan keıin bólim komandırine ótinish berip, anyqtama alady.

Keıin ol qujat senimhat boıynsha áskerı qyzmetti ótkerýshi adamnyń týystaryna beriledi.

Tıisinshe, olar anyqtamany qaryz alǵan ekinshi deńgeıli bankterge usynady jáne sol sátten bastap nesıeni tóleý keıinge qaldyrylady.