Nesıe tarıhynyń nashar bolýy zeınetaqy jınaǵyn paıdalanýǵa áser ete me

NUR-SULTAN. QazAqparat – Ártúrli sebeptermen bir kezderi nesıesin jappaǵan azamattarǵa zeınetaqy jınaǵy berilmeýi múmkin be? Tilshilerdiń bul suraǵyna Ortalyq kommýnıkatsııalar alańynda ótken baspasóz máslıhatynda «Otbasy bank» AQ basshysy Lázzat Ibragımova jaýap berdi, dep habarlaıdy QazAqparat tilshisi.

«Nashar nesıe tarıhy bir rettik zeınetaqy tólemin berýden bas tartýǵa sebep bolmaıdy. Bul jaǵdaılar bir-birine múlde baılanysty emes. Ekinshi kezeńde, ıaǵnı qarajat sizdiń arnaıy shotyńyzǵa túskennen keıin eger maqsattardyń biri - jańa ıpotekalyq nesıe alý bolsa, onda siz ekinshi deńgeıli bankterge eń qolaıly jaǵdaılardy izdeýge barasyz. Dál sol kezde kóbi (bankterdiń) sizdiń qaryzdaryńyzdy buǵan deıin qalaı tólegenińizdi taldaýy múmkin», - dep túsindirdi ol.

Al «Otbasy bank» týraly sóz qozǵaǵan Lázzat Ibragımova bul máselede ózi jetekshilik etip otyrǵan banktyń saıasaty qandaı ekennin de aıtyp ótti.

«Eger ótinim berer aldynda bir kún buryn ǵana basqa bank aldyndaǵy merzimi ótip ketken nesıeni japsańyz, ekinshi deńgeıli banktermen qarym-qatynasyńyzǵa biz qaramaımyz. Bizdiń naryqtyq baǵdarlamalarǵa sáıkes, qaryzdy tólegennen keıin, biz jańa problemalyq qaryzdar týraly basqa oqıǵalar bolmas úshin úsh aı kútemiz. Bul jaǵdaıda, siz basqa banktegi qaryzyńyzdy tólegennen keıin 90 kún ótken soń, sizdiń nesıe tarıhyńyzda másele týyndamaıdy», - dep qosty Lázzat Ibragımova.

Eske salsaq, 2021 jyly 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy.

Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy. Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi.

23 qańtardan Qazaqstanda zeınetaqynyń bir bóligin alýǵa ótinim qabyldaý bastaldy. Arnaıy portalda zeınetaqynyń bir bóligin alýǵa ótinim qabyldaý bastalǵaly úsh saǵattyń ishinde 4 myńnan astam adam ótinish berdi.