Nesıe raqymshylyǵyn jasamasaq, ekonomıka degradatsııaǵa ushyraıdy – Aıqyn Qońyrov
«Keshe ózderińiz biletindeı, biz halyqtyń, shaǵyn jáne orta bıznestiń nesıege batyp ketkenin aıtyp, Úkimetke saýal hat joldaǵan edik. Biz jalpy halyqpen etene jumys júrgizemiz. Kóbiniń máselesinen habarymyz bar. Azamattardyń kóbi nesıe júktemesine baılanysty qınalatynyn aıtady. Sebebi halyqtyń ishinde 4-5 bankte qaryzy bar azamattar bar. Olardy óteý tym qıyn. Halyqtyń kóbi osyndaı tyǵyryqta tur», - deıdi QKHP OK hatshysy, QR Parlamentindegi atalmysh partııa fraktsııasynyń jetekshisi Aıqyn Qońyrov QKHP Nur-Sultan qalalyq komıtetiniń keńsesinde ótken otyrysta.
Onyń aıtýynsha, qazirgi zańnamaǵa sáıkes azamattardyń alǵan qaryzy úshin bankter men mıkroqarjylyq uıymdardyń aldyndaǵy jaýapkershiligi kúsheıgen. Qarjylyq ınstıtýttar qaıtarylmaǵan qaryzdar úshin azamattardyń quqyǵyn shekteı alady.
«Keıbir qarjylyq ınstıtýttar azamattardyń el ishinde qozǵalysyn shekteýge deıingi quzyretke ıe bolǵan. Tipti poıyz ben ushaqqa otyrǵyzbaýǵa deıingi jaǵdaılar kezdesedi. Munyń aqyry ekonomıkany degradatsııaǵa ushyratynyn eskerý kerek», - dedi ol.
Aıqyn Qońyrovtyń sózine sensek bank sektorynyń ekonomıkanyń shynaıy sektoryndaǵy kúshi basym.
«Ekonomısterdiń aıtýynsha bul jaǵdaı qazir óziniń logıkalyq túıinine taqap qalǵan. Ótken ǵasyrda Batys elderiniń bankırleri men kapıtalısteri ekonomıkanyń basym bóliginiń nesıege batý máselesimen betpe-bet kelgen. Alaıda keıin sovet bıligi qulap qaldy da, jańa naryqtarǵa jol ashyldy. Tıisinshe olar bul júıeni jalǵastyrý múmkindigine ıe boldy. Biraq bizdegi jaǵdaıdy oılaıyq. Qazir Qazaqstan halqynyń 90 paıyzynda nesıe bar. Qazir kóp adamda endi nesıe alatyn jaǵdaı da joq. Sebebi jańadan qaryz alý úshin eskisin jabýyń kerek. Al eski nesıeni jabý úshin tabysyń bolýy tıis. Al devalvatsııaǵa baılanysty halyqtyń tabysy túsip ketti. Sol sebepti halyqta ony jabar shama da joq», - deıdi ol.
Eske sala ketsek keshe Májilistiń jalpy otyrysynda «Halyq kommýnısteri» fraktsııasynyń depýtattary atynan Úkimet basshysy Asqar Mamınge saýal joldaǵan bolatyn.
Olardyń aıtýynsha elde shekteý sharalary engizilgenge deıin turaqty túrde salyq tólegenimen, qazir obektıvti sebepterge baılanysty nesıelerge qyzmet kórsetý boıynsha kúrdeli jaǵdaıǵa tap bolǵan jeke jáne zańdy tulǵalar úshin keń aýqymdy nesıe raqymshylyǵyn júrgizý qajet.