Nesıe alyp beremin: Bes óskemendik alaıaqqa 3,4 mln teńgesin berip qoıdy

ÓSKEMEN. QazAqparat – Óskemen qalasynyń 5 turǵyny mıkroqarjy uıymdarynan nesıe alyp beremin degen alaıaqqa aldanyp, 3,4 mln teńgege shyǵynǵa batty, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, alaıaqtyq arbaýyna túsken 5 adam polıtsııaǵa aryzdandy. 23 jastaǵy qala turǵyny jábirlenýshilerdiń atyna qymbat smartfondar men smart-saǵattar rásimdegen. Olarǵa keltirilgen materıaldyq zalaldyń jalpy somasy 3 400 000 teńgeni qurady.

«Jedel-izdestirý sharalaryn júrgizgen polıtsııa qyzmetkerleri kúdiktini ustady. Er adam óz kinásin moıyndap otyr. Anyqtalǵandaı, ol jábirlenýshilerge mıkroqarjy uıymdarynan nesıe alyp beremin dep sendirgen. Sodan keıin olardyń attaryna taýarlyq nesıe alǵan», - delingen aqparatta.

Qazirgi ýaqytta atalǵan fakti boıynsha QR QK-niń 190-baby 1-bóligine (Alaıaqtyq) sáıkes sotqa deıingi tergeý amaldary bastaldy. Kúdikti 2 jylǵa deıingi merzimge bas bostandyǵynan aıyrylýy múmkin.