Neo Nomad Visa sheteldikterge qandaı múmkindik beredi

<p>ASTANA. KAZINFORM - Neo Nomad Visa álemniń ártúrli elinen kelgen saıahatshylarǵa kóptegen múmkindik beredi. Bul vıza sheteldik týrısterge Qazaqstanda bir jylǵa deıin turýǵa jáne ózderiniń sheteldegi kompanııalarynda qashyqtan jumys isteýine múmkindik beredi. Jańa V12-1 vızasyn alý úshin Qazaqstan Respýblıkasynyń sheteldegi elshiligine nemese konsýldyq mekemelerine júginý qajet. Bul týraly Týrızm jáne sport mınıstrligi habarlady.</p>

Qazaqstanda saıahattap júrip, jumysyn jalǵastyrǵysy keletin sheteldikter Neo Nomad Visa-ǵa ótinish bere alady. Ol úshin jaqyn mańda ornalasqan Qazaqstan Respýblıkasynyń sheteldegi mekemesine birneshe qujatty usyný qajet:

• Keıingi 6 aıdaǵy bank shotynan úzindi kóshirme, aı saıynǵy tabysy 3 000 AQSh dollarynan joǵary ekenin rastaıtyn qujat
• Azamattyǵy bar eldiń ýákiletti organy bergen salyq deklaratsııasy
• Azamattyǵy nemese turaqty mekenjaıy bar eldiń organy bergen sottalmaǵany týraly anyqtama
• Vızanyń qoldanylý merzimine deıin jaramdy medıtsınalyq saqtandyrý
• Qazaqstandaǵy týrıstik kompanııalardan shaqyrý (48 eldiń azamaty úshin talap etilmeıdi)

Neo Nomad Visa-ny rásimdeý 5 jumys kúninen aspaıdy. Vıza bir jylǵa deıingi merzimge beriledi jáne ony uzartý qarastyrylǵan. Negizgi ótinish berýshiniń otbasy músheleri de vıza ala alady.

Neo Nomad Visa arqyly Qazaqstanda jumys isteý múmkindigi qarastyrylmaǵanyn atap ótken jón. Qazaqstan Respýblıkasy Salyq kodeksiniń 216-babyna sáıkes Neo Nomad Visa ıesiniń Qazaqstanda salyq tóleý boıynsha mindettemeleri joq, óıtkeni onyń tabys kózi elden tys jerde ornalasqan.

Buǵan deıin Qazaqstanda zamanaýı kóshpendilerge arnalǵan jańa Neo Nomad vızasy engizilgeni týraly jáne onyń zamanaýı kóshpendilerge – saıahattap, qashyqtan jumys isteıtin sheteldik týrısterge arnalǵany týraly tolyq habarlaǵan bolatynbyz.