Nemis qarjygeri Peter Tıls «Dostyq» ordenimen marapattaldy

BERLIN. QazAqparat - Memleket basshysynyń tapsyrmasy boıynsha Elshi Dáýren Káripov strategııalyq yntymaqtastyq jónindegi Qazaqstan-German iskerlik keńesiniń (QGІK) burynǵy teń tóraǵasy, buǵan deıin «Deutsche Bank» AQ-nyń bas atqarýshy dırektorynyń laýazymyn atqarǵan Peter Tılske 1-dárejeli «Dostyq» ordenin tabystady, dep habarlaıdy QazAqparat QR SІM baspasóz qyzmetine silteme jasap.

Marapattaý rásimi saltanatty túrde elimizdiń Berlındegi Elshiliginiń ǵımaratynda «Deutsche Bank» basqarma múshesi Iorg Bongartstyń, GFR SІM-niń «Ońtústik Kavkaz jáne Ortalyq Azııa» bóliminiń basshysy Anke Konradtyń, GFR Ekonomıka jáne energetıka federaldyq mınıstrliginiń syrtqy ekonomıkalyq saıasat departamentiniń dırektory Ekhard Frantstyń, «DB Engineering & Consulting» kompanııasynyń bas dırektory, bıyl P.Tılstiń ornyna QGІK teń tóraǵasy laýazymyna taǵaıyndalǵan Nıko Varbanofftyń, sondaı-aq GFR-dyń basqa da qoǵamdyq-saıası jáne isker top ókilderiniń qatysýymen ótti.

D.Káripov QR Prezıdenti Qasym-Jomart Toqaevtyń atynan ekijaqty jemisti yntymaqtastyqty nyǵaıtýǵa qosqan úlesi úshin P.Tılske joǵary memlekettik nagradany tabystaı otyryp, «9 jyl boıy QGІK teń tóraǵasy laýazymyn atqarǵan Peter Tıls ekonomıkanyń túrli salalaryndaǵy birlesken jobalardy júzege asyrýǵa jan-jaqty qoldaý kórsetti, bıznes ókilderi arasynda baılanys ornatty», – dep atap ótti.

Memleket basshylyǵyna osyndaı joǵary nagrada úshin rızashylyǵyn bildirgen P.Tıls Qazaqstan men Germanııa arasyndaǵy qatynastardy odan ary damytý men dıversıfıkatsıalaýdyń zor áleýetine toqtaldy.

Peter Tıls tájirıbeli bankır jáne qarjylyq qyzmetter basshylyǵynda 40 jyldyq eńbek ótili bar. 1977 jyldan bastap ol «Deutsche Bank AG» kompanııasynda túrli joǵary laýazymdar atqardy, banktiń Eýropa jáne Ortalyq Amerıka elderindegi aımaqtyq bólimshelerin basqardy. Joǵary deńgeıdegi kásibıligi men eńbek tájirıbesi arqasynda, 2007-2019 jyldar aralyǵynda Qazaqstan Prezıdenti janyndaǵy sheteldik ınvestorlar Keńesiniń múshesi boldy.