Neke qııýǵa ótinish bildirgender tegin keńes alyp, arnaıy nusqaýlyqpen tanysady – mınıstr

<p>Qazaqstanda neke qııýǵa ótinish bildirgen juptar otbasyn josparlaý týraly keńes alyp, arnaıy nusqaýlyqpen tanysýǵa mindetteledi. Bul týraly QR Mádenıet jáne aqparat mınıstri Aıda Balaeva Úkimet otyrysynda aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.</p>

«Profılaktıkalyq jumystardyń negizi – otbasyn sanaly túrde qurýǵa múmkindik jasaý. Osyǵan oraı, BUU Halyq qorymen birlesip Astana men Shymkent qalalarynda pılottyq joba iske qosyldy. Onda neke qııýǵa ótinish bildirgen azamattarǵa otbasyn josparlaý, psıhologııa, reprodýktıvti densaýlyq, ortaq bıýdjetti josparlaý jáne basqa da mańyzdy máseleler boıynsha tegin keńes berý, oqytý qarastyrylǵan. Nátıjesi sátti bolsa, osy tájirıbeni barlyq óńirlerge engizýdi qolǵa alamyz», - dedi Aıda Balaeva Úkimet otyrysynda.

Sonymen qatar, jyl sońyna deıin «Baqytty qazaqstandyq otbasy» ınteraktıvti nusqaýlyǵy ázirlenedi. Nekege turatyn juptardyń otbasylyq dástúrleri men rýhanı-adamgershilik qundylyqtary týraly aqparattar «Elektrondyq úkimet» júıesinde beınerolık túrinde kórsetiledi.

Nekege turýǵa onlaın ótinish bergen azamattar osy nusqaýlyqpen mindetti túrde tanysyp shyǵýy tıis.

«Qazir elimizde Otbasy saıasaty boıynsha 469,3 mln teńgeni quraıtyn 156 áleýmettik joba bar. Bólingen qarjynyń 40% turmystyq zorlyq-zombylyqtyń aldyn alýǵa bólingen, 25% - jastar arasynda otbasylyq qundylyqtardy nasıhattaýǵa, 10% - halyq arasynda reprodýktıvti densaýlyqty saqtaýǵa, 15% - jaǵdaıy tómen otbasylarmen profılaktıkalyq jumystarǵa, 10% - basqa baǵyttarǵa jumsalýda», - dep túsindirdi mınıstr.

Buǵan deıin A. Balaeva statıstıka kóńil kónshitpeıtinin, 4 jylda turmystyq zorlyq-zombylyqtan 869 adam kóz jumǵanyn aıtqan edi.

Sondaı-aq, QR Іshki ister mınıstriniń orynbasary Igor Lepeha Qazaqstanda turmystyq zorlyq-zombylyq jazasy qalaı kúsheıtilgenin aıtyp bergen edi.