Negizgi daqyldardy sýbsıdııalaýǵa 35,2 mlrd teńge qajet
— Ósimdik sharýashylyǵy óniminiń shyǵymdylyǵy men sapasyn arttyrýdy sýbsıdııalaý qaǵıdalaryna sáıkes, jergilikti atqarýshy organdardyń qaýlysymen bekitilgen normalar boıynsha sýbsıdııa negizgi daqyldardyń 1 tonnasy nemese 1 gektary úshin tólenedi. Bıdaıdy qospaǵanda, basym daqyldar óńirlerdi mamandandyrý shemasyna sáıkes aıqyndalady. Bul sharalar otandyq óndiris shıkizatyn óńdeıtin kásiporyndardyń júktemesin arttyryp, ónim kólemin ulǵaıtýǵa jáne eksportty damytýǵa baǵyttalǵan, — dedi Premer-Mınıstr.
Onyń atap ótýinshe, jergilikti atqarýshy organdar negizgi daqyldardy sýbsıdııalaýdyń oryndylyǵyn ózderi anyqtaıdy. Qazirgi tańda negizgi daqyldar qatarynda dándi daqyldar, qaraqumyq, maıly daqyldar jáne qant qyzylshasy bar.
— 2024 jyly bıdaı óndirisi 19,8 mln tonnaǵa jetip, ótken jylmen salystyrǵanda 64 paıyzǵa artty. 3-4 synypty bıdaıdyń úlesi 86 paıyzǵa ósti. Óńdeýshi kásiporyndar úshin bıdaıdyń baǵasy qolaıly jáne jetkilikti. Bıyl bıdaıdyń ishki baǵasy tonnasyna 95-105 myń teńge aralyǵynda saqtalyp, egin jınaýǵa jaqyndaǵanda 65-70 myń teńgege deıin tómendedi. Bıdaıdy sýbsıdııalaýǵa aıtarlyqtaı qarjy shyǵyny kerek. Al negizgi daqyldardy sýbsıdııalaýǵa 35,2 mlrd teńge qajet, — dedi Oljas Bektenov.
Buǵan deıin elimiz jańa naryqtarǵa 1,5 mln tonnaǵa deıin astyq eksporttaýdy josparlap otyrǵanyn jazǵan edik.
Munan bólek, Qytaı kompanııalary elimizdiń 3 óńirinde astyq pen júgeri óńdeıtin zaýyttar salmaq.