NEET sanatyna qandaı jastar enedi - mınıstr jaýaby
Aıta keteıik, mınıstr «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasyn birinshi oqylymǵa usyndy.
«Elimizde jumyssyz jáne oqýdan shyǵyp qalǵan jastar kóp ekeni belgili. Bul másele zań jobasynda keńinen qarastyrylǵan. Atap aıtqanda, NEET sanatyndaǵy jastardy biz 4-ke bólýdi qarastyrdyq. Onyń birinshisi – jumyssyz jastar, oqýdan shyǵyp qalǵan, kolledjder men mektepterden shyǵyp qalǵan jastar. Biz olardy anyqtaımyz, halyqty jumyspen qamtý ortalyqtarynan derekteri alynady. Ekinshi sanatta – jumys isteı alatyn múgedek jandar, úshinshi sanatta – ártúrli sozylmaly aýrýlarmen aýyratyn nemese alkogol jáne basqa da zııandy nárselerge táýeldi, belsendi emes jastarymyz bar, ol jastarmen de jumys isteýdi qolǵa alamyz», - dedi Aqparat jáne qoǵamdyq damý mınıstri.
Aıtýynsha, NEET boıynsha tórtinshi sanatqa úı sharýasyndaǵy jastar, kópbalaly nemese jalǵyzbasty analar enedi.
«Eń aldymen, olardyń óńirlerdegi aýmaqtyq sanyn anyqtaımyz, qazaqstandyq esepteý tásilimen ındekske engizemiz jáne jumyspen qamtý sharalaryn qolǵa alamyz», - dedi Darhan Qydyráli.
Buǵan deıin mınıstr jastar saıasaty týraly zań jobasynda qandaı jańashyldyqtar bar ekenin túsindirgen edi. Zań jobasynda «Jastardyń damý ındeksi», «Jastardyń áleýmettik qyzmetteri», «Ýaqytsha jumysqa ornalaspaǵan jastar (NEET)», «Jastarmen jumys jónindegi maman», «Jastardyń eńbek jasaqtary», «Jastar resýrstyq ortalyqtarynyń fýnktsııalaryn keńeıtý» uǵymdaryn zańnamalyq bekitý usynylǵan.