Nedovesov Meksıkadaǵy ATP 250 týrnıriniń fınalynda jeńilip qaldy

<p>ASTANA. KAZINFORM &ndash; Qazaqstannyń juptyq syndaǵy birinshi raketkasy Aleksandr Nedovesov Los-Kabos (Meksıka) ATP 250 týrnıriniń fınalynda jeńilis tapty.</p>

Qazaqstandyq tennısshi ekvadorlyq Gonsalo Eskobarmen birge sońǵy básekede jarystyń 4-raketkalary, aýstralııalyqtar Maks Persell – Djordan Tompsonmen chempıondyq ataqty sarapqa saldy.

Birinshi partııada esep 5:5 bolǵan mezette aýstralııalyq jup breık jasap ketti – 7:5.

Ekinshi sette match taǵdyry taı-breıkte sheshildi, bul joly da aýstralııalyqtardyń asyǵy alshysynan tústi – 7:6 (7:2).

Bir saǵat 38 mınýtqa sozylǵan báseke barysynda A.Nedovesov – G.Eskobar 3 eıspen birge 1 breık-poıntty paıdalana aldy. Qarsylastary 5 eıs, 2 breıkke (6 breık-poınt) qol jetkizdi. Bul qazaqstandyq tennısshiniń bıylǵy maýsymdaǵy ATP dodalaryndaǵy alǵashqy fınaly bolatyn. 

Eske sala keteıik, budan buryn Dmıtrıı Popkonyń Florıda shtatynda qatarynan úshinshi ret fınalǵa ótkenin jazǵan bolatynbyz. Sondaı-aq qazaqstandyq tennısshiler Dýbaı ATP 500 týrnırinde baq synaıdy.