Nebári 9 áıel 33 mlrd. teńge «dekrettik» tólem alypty! - baspasózge sholý
***
Astanada Qazaqstan Respýblıkasy Bilim jáne ǵylym mınıstri Baqytjan Jumaǵulovtyń tóraǵalyǵymen orta bilim berý júıesin jetildirý máseleleri boıynsha Úılestirý keńesiniń otyrysy bolyp ótti. Keńeste Qazaqstan Respýblıkasynyń 2011-2020 jyldarǵa arnalǵan bilim berýdi damytýdyń memlekettik baǵdarlamasyn iske asyrýdyń, onyń ishinde bilim berý uıymdaryn beıindik oqytýǵa kóshirýdiń kókeıkesti máseleleri talqylandy. Osy másele arqaý bolǵan maqala «Egemen Qazaqstan» gazetinde «Beıindik oqytý - ýaqyt talaby» degen taqyryppen jaryq kórdi. «Qazirgi tańda bilim berýdi damytýdyń memlekettik baǵdarlamasyn iske asyrýdyń mańyzdy máseleleriniń biri 12 jyldyq bilim berý aıasynda beıindik oqytýǵa kóshý bolyp tabylady. Osyǵan oraı jıynǵa qatysýshylar beıindik oqytý baǵdarlamasyn iske asyrýdyń tujyrymdamalyq negizderin qarastyrdy. Qazaqstanda beıindik oqytý júıesin damytýdyń ózektiligi birqatar faktorlarmen, sonyń ishinde 12 jyldyq bilim berý úlgisine kóshý, mektep túlekterine qoıylatyn naryq talaptary, bilim berý deńgeıleriniń sabaqtastyǵynyń qajettiligi sııaqty negizdermen túsindiriledi», dep jazady basylym.
***
Sansyz tirshilik, baılyq kózi retinde qansha ǵasyrlar boıy jaǵalaýyndaǵy elderdi asyrap kele jatqan kári Kaspıı ekologııasynyń kúrt nasharlap, adamzatty alańdata bastaǵaly da biraz boldy. «Alash aınasy» gazetiniń búgingi sanyndaǵy «Kaspıı teńiziniń bıologııalyq resýrstaryn qalaı qorǵaımyz?» atty maqalada teńiz deńgeıiniń qanshalyqty tartylyp, bıoresýrstarynyń qansha azaıyp bara jatqany jaıly ótkir másele talqylanady.
Elimizdiń densaýlyq saqtaý vıtse-mınıstri Erik Baıjúnisov taıaýda Qazaqstanda medıtsınalyq emhanalar kórsetilgen qyzmetter úshin tólem jasaýdyń jańa júıesine kóshetini jaıly málimdegen bolatyn. Endi osy rette em-dom, ota jasaý qyzmeti baǵalaryn álemdik standarttarǵa laıyqtaý degen másele ózdiginen týatyny sózsiz. Olaı bolsa, «Ota jasaý baǵasyn álemdik deńgeıge jetkizýge otandyq hırýrgııanyń kadrlyq jáne materıaldyq bazasy daıyn ba?» degen saýal da til ushyna oralady. Al osy saýal «Alash aınasy» basylymynyń búgingi «Oı kókpar» aıdarynda mamandar talqysyna salynǵan.
***
Qazaqta «qursaǵy altyn analar» degen uǵym bar, ol óte kóp sábıge ómir syılaǵan asyl analarǵa qatysty qoldanylady. Óıtkenimen sonsha eńbek sińirmese de, bala týýyn memleketke «at basyndaı altynǵa» buldaǵan áıelder bar bolyp shyqty. Bul jaınyda «Aıqyn» gazetiniń búgingi sanyndaǵy «Bala týý da bazarǵa aınalǵany ma?» degen taqyrypta tarqatyla aıtylǵan. «Senattyń keshegi jalpy otyrysynda tóbe shashty tik turǵyzǵan málimet jarııa etildi: nebári 9 áıel 33 mlrd. teńge «dekrettik» tólem alypty! Osydan memlekettiń ózi de shoshynsa kerek, Úkimet osyǵan tosqaýyl qoıýǵa tıisti, ári qatań tyıym salý sharalary qarastyrylǵan arnaıy zańnyń jobasyn Parlamentke engizgen», - dep jazady basylym.