Nazym Qyzaıbaı Olımpıadadan keıin birinshi ret sharshy alańǵa shyǵady – bas bapker
Jalpy, ishki birinshilikke 94 burymdy boksshy qatysyp jatyr. Olardyń arasynda Parıj Olımpıadasynyń qatysýshylary men qola júldegeri Nazym Qyzaıbaı da synǵa túsedi.
Bul týraly Kazinform tilshisine eksklıýzıv suhbat bergen Ulttyq quramanyń bas bapkeri Eldos Saıdalın aıtyp berdi.
– El birinshiligine áıelder arasynda osyǵan deıin kózge túsip júrgen kil myqtylar da synǵa túsedi. Olardyń qatarynda 48 keli salmaqta Parıj Olımpıadasynyń qola júldegeri Nazym Qyzaıbaı da bar. Ol Olımpıada oıyndarynan keıin birinshi ret sharshy alańǵa shyqqaly otyr. Sonymen qatar 50 kelide álem chempıony Alýa Balqybekova, 54 kelide Jaına Shekerbekova, 57 kelide Karına Ibragımova, 60 kelide Rımma Volosenko, 75 keli de Valentına Halzova bastaǵan boksshylar sharshy alań kórigin qyzdyrady dep senemiz. Sonymen qatar elimizdiń ár óńiri ózderiniń kóshbasshy boksshylaryn iriktep alyp keldi. Jańa chempıondardyń esimderi de belgili bolýy múmkin, - dedi bas bapker Eldos Jánibekuly.
Sondaı-aq, bas bapker Qazaqstan chempıonatyna kimderdiń qatyspaǵanyn da atap ótti.
– Ózderińiz bilesizder, osydan bir apta buryn ǵana Taılandta ótken Azııa chempıonatynda qyzdarymyz 5 altyn, 5 qola medal jeńip alǵan bolatyn. Mine, sol júlde alǵan 10 boksshy ǵana bul el chempıonatynan bosatyldy. Olar ishki birinshilikke qatyspasa da, ulttyq quramanyń úzdik boksshylary bolyp qala beredi, - dedi bas bapker.
Aıta keteıik, 24 jeltoqsanǵa deıin jalǵasatyn el chempıonatynyń barlyq saıystarynyń kúndizgi sessııasy 14:00-de, al keshki sessııasy 18:30-da ótedi. Tek sońǵy kúni jarystar 12:00-de bastalady. Shırek fınaldyq kezeń 21-22 jeltoqsan aralyǵynda ótse, jartylaı fınal 23 jeltoqsanda, al fınal 24 jeltoqsanda bolady.
Esterińizge sala keteıik, osyǵan deıin bokstan erler quramasynyń bas bapkeri Qaırat Sátjanov el chempıonatyna baılanysty óz pikirimen bólisken bolatyn.