«Názik jandarǵa ne syılaýǵa bolady?» - baspasózge sholý
***
Keshe Memleket basshysy Nursultan Nazarbaev 8 naýryz - Halyqaralyq áıelder kúni merekesine oraı Qazaqstan áıelderi qoǵamdastyǵynyń bir top ókilderimen kezdesti. Osy kezdesý týraly «Egemen Qazaqstan» gazetiniń senbilik sanynda «Áıel otbasynyń ǵana emes, Otannyń da uıytqysy» degen taqyryppen maqala jarııalandy. Basylymnyń jazýynsha, kezdesýge elimizdiń barlyq óńirlerinen kelgen, ekonomıkanyń túrli sektorlarynda, mádenı-áleýmettik salalarda jáne memlekettik qyzmette isteıtin áıelder qaýymynyń ókilderi qatysty. Memleket basshysy olardy kele jatqan Halyqaralyq áıelder kúnimen quttyqtap, Qazaqstannyń barsha áıelder qaýymyna baqyt, densaýlyq jáne baq-bereke tiledi.
Elbasy áıelder qaýymymen áńgimede qazir qyzý talqyǵa túsken elimizdegi saılaý naýqany týraly da sóz qozǵady. «Qazir saılaý naýqany bastalyp ta ketti. Kezekten tys prezıdenttik saılaý týraly bastamany da negizinen áıelder qaýymy qoldady. Men kún saıyn myńdaǵan hattar alyp jatyrmyn. Búgin erteńgisin de bir qushaq hat keldi. Olardyń barlyǵy saılaýdy qoldap, menen óz kandıdatýramdy usynýdy surap jatyr», - dedi Nursultan Nazarbaev. «Meniń jeke josparym múldem basqa bolatyn, shynymdy aıtaıyn. Qazaqstandy jyldar boıy basqaryp kelemin, táýelsizdiktiń alǵashqy jylynan memleketti qalyptastyryp, qurdyq. Alaıda, búkilhalyqtyq tilekter, eldiń nıeti, jurttyń qalaýy bar, ony da eskerý qajet. Sondyqtan da, sizdermen aldaǵy josparymdy, qadamymdy aqyldasýǵa da bolady ǵoı dep oılaımyn», - dedi Elbasy.
«Egemen Qazaqstan» gazetiniń jazýynsha, keshe Ortalyq saılaý komıssııasynda Qazaqstan Respýblıkasy prezıdenttigine kandıdattyqqa usynylǵan «Rýhanı qoǵam álemi» qoǵamdyq qorynyń prezıdenti Lımana Qoıshıeva men ýaqytsha jumyssyz Safıolla Aldajanov memlekettik tildi erkin meńgergendigin anyqtaý jónindegi Lıngvıstıkalyq komıssııaǵa synaq tapsyrdy. Synaq nátıjesin jarııalaǵan lıngvıstıkalyq komıssııanyń tóraǵasy Myrzataı Joldasbekov úmitkerdiń biri ótip, ekinshisi súringenin málim etti.
«Lıngvıstıkalyq komıssııa Lımana Qoıshıeva memlekettik tildi erkin meńgergen degen qorytyndyǵa keldi», - dedi komıssııa tóraǵasy.
Al ekinshi kandıdat birinshi kezeńde jazba jumysynan 42 qate jibergen, onyń ishinde emile qatesi - 17, tynys belgisi - 18, sóılem quraýy jaǵynan 7 qate bar. Synaq tapsyrýshy ekinshi jáne úshinshi talaptarǵa da jóndi jaýap bere almaǵan.
«Jahandaný: úmit pen kúdik» taqyrybyn ózińiz tańdap aldyńyz. Ókinishke qaraı, jahandaný týraly uǵymyńyz óte taıaz bolyp shyqty. Sondyqtan Lıngvıstıkalyq komıssııa Safıolla Qalabaıuly Aldajanov memle-kettik tildi erkin meńgermegen degen qorytyndyǵa keldi», - dedi M.Joldasbekov. Maqala taqybyry: «Bir úmitker ótti, ekinshisi súrindi».
***
«Qazaqstandaǵy meıramhanalar óz óndiristerine Qazaqstanda shyǵatyn ónimderdi kóbirek qoldanýǵa ázir. Bul týraly «HoReCa-Qazaqstan» meıramhana-qonaq úı bıznesi kásiporyndary ulttyq qaýymdastyǵynyń prezıdenti Igor Kopaılov habarlady», - dep jazady «Aıqyn» gazeti senbilik sanyndaǵy «Meıramhanalar jergilikti ónimdi kóbirek qoldanady» degen taqyryptaǵy maqalasynda.
I.Kopaılovtyń aıtýynsha, qazir qazaqstandyq taýarlardyń baǵasy tómendigimen erekshelenip tur jáne sapasy da ımporttalatyn ónimderden kem emes. Biraq bul jerdegi áńgime ásirese aýyl sharýashylyǵy ónimderine baılanysty. Qaýymdastyq basshysynyń aıtýynsha, Qazaqstandaǵy meıramhanalardyń ıelerinde otandyq óndirýshiler týraly málimet óte az. Qazaqstandaǵy meıramhanalar men qonaq úılerdiń basshylary qazaqstandyq óndirýshilermen jumys isteýge daıyn. Qazaqstandaǵy meıramhanalar jergilikti azyq-túlikten ázirlengen taǵamdardy usynǵanyn qalaımyz, biraq eshkimdi májbúrleı almaımyz, májbúrlemeımiz de. Tek, yntalandyramyz", - dedi Kopaılov.
Almaty qalasy TMD elderi arasynda týrıster úshin eń qymbat qalalardyń úshtigine kirse, álem boıynsha mereke toılaýǵa qolaıly eń arzan qalalardyń qatarynda eken. Bul resmı derek qanshalyqty ras?! Kóktemniń jyly shýaǵymen qatar keletin alǵashqy mereke Halyqaralyq áıelder kúni qarsańynda osy aqpardy «Aıqyn» gazeti zerttep kórýge tyrysqan. Basylymnyń dereginshe, ortasynda «ana», «súıem» degen jáne taǵy basqa sózdermen bezendirilgen gollandııalyq raýshan gúlder - 70 000 teńge, jergilikti raýshan gúlder 60 000 teńge turady. Al Almaty qalasy boıynsha ádette bir taly 500 teńgede satylatyn qyzǵaldaq quny mereke kúnderi 1000-1500 teńgege baǵalanady. Al áje-apalarǵa syılaýǵa bolatyn otyrǵyzylǵan gúlderdiń baǵasy 4000 teńgeden bastap, túrine, tuqymyna, kólemine qaraı qymbattaı beredi. «Almaty qalasy boıynsha bul kúni kóptegen oıyn-saýyq mekemelerinde arnaıy merekelik shoý-baǵdarlamalar jasalady. Sol sebepti jastardyń jappaı baratyn klýbtarynyń baǵasy qalypty kúnderi adam basyna 7000-10000 teńge bolsa, merekede 15000-20000 teńge. Al orta býyn oıyn-saýyq quratyn meıramhanalardyń eń tómengi máziri 30 000 teńgeden bastalady», - dep jazady basylym. Maqala «Názik jandarǵa ne syılaýǵa bolady?» degen taqyryppen basylyp shyqty.
«10 jastaǵy qaraǵandylyq balany ákesiniń kelisiminsiz Germanııaǵa alyp ketti», dep jazady «Vremıa» gazeti «Mesto vstrechı naznachıt nelzıa» degen taqyryptaǵy maqalasynda. Basylymnyń atap ótýinshe, Qaraǵandy qalasynda turatyn polıtsııa moıory Andreı Vostrılov jarymen dám-tuzy jaraspaı ajyrasqanymen kámelettik jasqa tolmaǵan qyzy Vıtalınaǵa únemi qamqorlyq kórsetip otyr. ıAǵnı, óziniń ákelik mindetin tolyǵymen atqarǵan. Alaıda, Germanııa azamatyna turmysqa shyqqan áıeli taıaýda Andreıdiń kelisiminsiz qyzyn alyp Eýropaǵa kóship ketken. Maqalanyń tolyq nusqasyn «Vremııa» gazetinen oqı alasyzdar.