Nazarbaevtyń qurmetine qoıylǵan hrızantema Japonııada «Mártebeli» ataǵyn ıelendi
Japonııada 9 qyrkúıek Hrızantema merekesin toılaıdy jáne qarasha aıy dástúrli maýsymnyń ulttyq gúli bolyp sanalady. Búkil el boıynsha saıabaqtar men hramdarda ótetin Hrızantema festıvalinde hrızantemanyń barlyq pishinderi men myńdaǵan túrleri usynyldy.
Osy jyly japon qoǵamdastyǵyna alǵash ret «Prezıdent Nazarbaev» dep atalatyn hrızantema surypy usynyldy. Bul gúl 2016 jyly Memleket basshysynyń Japonııaǵa jasalǵan resmı sapary barysynda ósirilip, tanystyrylǵan bolatyn. «Prezıdent Nazarbaev» hrızantemasy 2 metrge deıin jetetin bıiktigi men tyǵyz ornalasqan kúltelerimen adamnyń basyna teń keletindeı sary túıneginiń kólemimen erekshelenedi. Sary hrızantema Japonııanyń sımvoly bolyp tabylady jáne ımperator taǵy men osy el azamattarynyń ulttyq pasporttaryn áshekeleıtin memlekettik gerbin bildiredi.
Elbasyn qurmetine oraı atalǵan gúl ártúrli baıqaýlar men festıvalderde júldeli oryndarǵa ıe bolyp, florıster men áýesqoılar arasynda keńinen tanylyp otyr. Atap aıtqanda, 6 qarashada Izýmı qalasynda (Osaka prefektýrasy) ótken Japonııanyń Hrızantema festıvalinde 300 myńǵa jýyq gúldiń arasynda «Prezıdent Nazarbaev» hrızantemasy Japonııa Bilim, mádenıet, sport, ǵylym jáne tehnologııalar mınıstriniń, sondaı-aq Jalpy ulttyq isteri jáne kommýnıkatsııalar mınıstriniń arnaıy syılyǵyn ıelendi.
Sondaı-aq, Tokıo Úkimetiniń qoldaýymen 7 qarashada Japonııanyń Hrızantema áýesqoılary qaýymdastyǵy Hıbııa ortalyq saıabaǵynda uıymdastyrǵan 95-shi Tokıo hrızantema festıvalinde «Prezıdent Nazarbaev» gúli «Mártebeli» ataǵyna ıe boldy.
Buǵan deıin hrızantema suryptaryna memleket basshylarynyń esimderi berilmegen. Olarǵa «Shyǵys jeli», «Patsha», «Bes ımperator» sııaqty lırıkalyq sıpattaǵy jalpylama ataýlar qoıylyp kelgen.