Nazarbaevtyń AQSh-qa sapary uzaqmerzimdi qarym-qatynastyń alǵashqy qadamy - amerıkalyq sarapshy

VAShINGTON. QazAqparat - Qazaqstan Prezıdenti Nursultan Nazarbaevtyń Vashıngtonǵa resmı sapary Qazaqstan-AQSh arasyndaǵy uzaqqa sozylatyn qarym-qatynastyń alǵashqy qadam boldy. Mundaı pikirdi «Mura» qory Syrtqy saıasat ortalyǵynyń dırektory Lıýk Koffı bildirdi, dep habarlaıdy QazAqparat tilshisi.

«Prezıdent Nursultan Nazarbaevtyń Aq úıde Donald Tramppen ótkizgen kezdesýine kóńilim toldy. Tramptyń el basqarǵanyna bir jyl ýaqyt tolmastan osyndaı kezdesý ótkizýi Qazaqstan men AQSh arasyndaǵy baılanystyń jańa deńgeıge kóterilgenin kórsetedi. Qazaqstan - AQSh-tyń Ortalyq Azııadaǵy mańyzdy seriktesi. Bizge ortaq syn-qaterler óte mol, sonymen qatar ortaq múmkindikterimiz de jeterlik. Bul sapar Qazaqstan men AQSh arasyndaǵy uzaqqa sozylatyn qarym-qatynastyń alǵashqy qadamy bolady dep úmittenemin», - dedi ol.

Onyń aıtýynsha, eki el arasyndaǵy baılanystardyń múmkinshilikteri kóp. Máselen, Qazaqstan Prezıdentiniń sapary aıasynda eki eldiń arasynda jalpy somasy 7 mıllıard dollardy quraıtyn 20-dan astam kelisimge qol qoıyldy.

«Bul - óte jaqsy jańalyq. Ásirese, energetıka salasyna Qazaqstan men AQSh tarapynyń qyzyǵýshylyǵy erekshe. Sondaı-aq, bul kelisimsharttar Qazaqstannyń munaıy men gazyn jańa naryqqa shyǵaryp, ekonomıkasyn ártaraptandyrýǵa múmkindik beredi. Budan bólek, AQSh-tyń Eýropadaǵy odaqtastaryna energetıkanyń jańa kózderin ashýyna jaǵdaı jasap, eki el arasynda qaýipsizdik máselesindegi seriktestikti nyǵaıta túsedi», - dedi ortalyq basshysy.

Lıýk Koffıdiń paıymynsha, eki eldiń Aýǵanstan problemasyn sheshýge de kúsh biriktirýge múmkinshilikteri bar. Qazaqstan óńirdegi kóshbasshy memleket retinde Aýǵanstandaǵy ekonomıkalyq jáne qaýipsizdik máselelerinde turaqtylyq qalyptastyrýǵa kómek bere alady.

«Jalpy, Qazaqstan keıingi kezderi kóptegen dıplomatııalyq bastamalar kóterip júrgeni málim. Jáne de bul ‒ óte durys. Mysal retinde Sırııa janjalyn retteý jónindegi Astana protsesin aıtýǵa bolady. Ol biz kútkenimizden de joǵary tabysty boldy», - dedi Lıýk Koffı.

Sonymen qatar ol Tramptyń  Ortalyq Azııaǵa qatysty saıasatynyń aldaǵy ýaqytta qalaı órbýi múmkindigine baılanysty oıymen de bólisti.

«Barak Obama Aýǵanstanda terrorıstermen soǵystyń aıaqtalǵany jóninde sheshim qabyldaǵan soń, Ortalyq Azııamen baılanysymyz azaıa bastady. Obama ákimshiligi «S5+1» bastamasynan basqa aıtarlyqtaı eshteńe jasaǵan joq. Menińshe, Prezıdent Tramp múlde basqa saıasat ustanady. Bizge eki el arasyndaǵy uzaq merzimge sozylatyn áriptestik kerek. Ázirge Tramp ákimshiligi mundaı qadamǵa belsene qoımasa da, aldaǵy ýaqytta osy máseledegi baılanystyń nyǵaıatynyna senimdimin», - dedi amerıkalyq sarapshy.