Nazarbaev zııatkerlik mektepterinde aýdıttik tekserýden keıin ne ózgerdi

<p>ASTANA. KAZINFORM &mdash; Elimizde Nazarbaev zııatkerlik mektepterinde memlekettik aýdıtten keıin birqatar shara qabyldandy.</p>

Naqty aıtqanda, shtat sanyn esepteýdiń jańa normatıvi jáne satyp alý boıynsha ózgerister engizildi. Bul týraly Joǵary aýdıtorlyq palatasy habarlaıdy. 

Memlekettik aýdıt NZM-da byltyr shildede júrgizilgen tekserý aıasynda qarjy-sharýashylyq jáne uıymdastyrýshylyq máselelerge qatysty birqatar zań buzýshylyq pen kemshilikter anyqtaldy, biraq bul oqý protsesine qatysy joq. 

Joǵary aýdıtorlyq palatanyń tapsyrmalaryn oryndaý úshin NZM-de mynadaı sharalar qabyldandy:

— Taýarlardy, jumystar men kórsetiletin qyzmetterdi satyp alý qaǵıdalaryna ózgerister engizildi. Endi bir kózden alý tásilimen satyp alý qaıta satyp alý ótpedi dep tanylǵan jaǵdaıda ǵana (atap aıtqanda, tender arqyly) ótkiziletin bolady. NZM satyp alý sharttary men olardyń oryndalýy jónindegi qujattardy satyp alýdyń resmı veb-portalyna ornalastyra bastaıdy. Bul rette tikeleı shart jasasý arqyly kitaptar men kórkem ádebıetterdi satyp alý tásili tolyǵymen alyp tastaldy;

— Oqý-aǵartý mınıstrliginiń Orta bilim komıtetimen kelisý boıynsha NZM damý strategııasyn ázirleý jáne onyń oryndalýyn baqylaý reglamenti bekitildi. Buryn bul aspektini memlekettik organdar qadaǵalamaǵan bolatyn;

— Ulttyq bilim berý derekqoryn «NZM» DBU biryńǵaı aqparattyq-bilim berý júıesimen tsıfrlyq ıntegratsııalaý júrgizildi;

— Zııatkerlik mektepter qyzmetkerleriniń shtat sanyn esepteý normatıvi ázirlenip, bekitildi;

— Sheteldik pedagogterdiń laýazymdary «NZM» DBU fılıaldarynyń úlgilik shtat kestesine engizilip, olardyń qyzmetin baǵalaý ólshemsharttary da bekitildi;

— NZM fılıaldaryna sheteldik muǵalimderdi tartý shyǵyndarynyń esebi jańartyldy. Atap aıtqanda, bir sheteldik pedagogke turǵyn úıdi jalǵa alý alańynyń normalary belgilendi, bólme sany kórsetilýi tıis;

— Fılıaldar úshin kúzet qyzmetteriniń normalary beketterdiń sany men olardyń jumys isteý ýaqyty aıqyndala otyryp bekitildi;

— NZM ekojúıesindegi uıymdar úshin aqparattyq júıeler men servısterdi ázirleýge jáne damytýǵa arnalǵan tehnıkalyq tapsyrmalardy jasaý tártibi qabyldandy;

— NZM-ge aqyly negizde oqýǵa qabyldaý qaǵıdalaryna ózgerister engizildi, atap aıtqanda oqýshylardy oqýǵa qabyldaý aldynda naqty ólshemsharttar belgileı otyryp, olardyń bilimin baǵalaýdyń mindetti rásimi qosyldy;

— Elektıvti kýrstardy aıaqtaǵan oqýshylardyń nátıjelerin esepke alý jýrnaly ázirlendi;

— NZM merdigerleriniń biri qurylys-montajdaý jumystarynyń 8,5 mln teńge somasynda tólengen artyq qunyn ótedi.

Aıta keteıik, joǵaryda atalǵan barlyq nusqamanyń oryndalýy Joǵary aýdıtorlyq palatanyń baqylaýynda bolady. 

Eske sala keteıik, byltyr jyl sońynda Oljas Bektenov NU jáne NZM Joǵary qamqorshylyq keńesiniń otyrysyn ótkizgen edi.